रामेछाप – सदरमुकाम मन्थलीमा निर्माण गरिएको ३ वटा सरकारी कार्यालयको भवन एकैसाथ हस्तान्तरण गरिएको छ ।

शुक्रबार एक औपचारिक कार्यक्रमकाबीच शहरी विकास डिभिजन कार्यालयको दुई वटा भवन, खानेपानी तथा सरसफाइ डिभिजन कार्यालयको दुईवटा र प्रमुख जिल्ला अधिकारीको निवास भवन एकसाथ हस्तान्तरण गरिएको हो ।

भवन निमार्णको जिम्मा पाएको निर्माण व्यवसायीले शहरी विकास डिभिजन कार्यालयलाई र डिभिजन कार्यालयले खानेपानी तथा सरसफाइ डिभिजन कार्यालय र जिल्ला प्रशासन कार्यालयलाई हस्तान्तरण गरेको हो ।

२०७२ सालको भूकम्पपछि राष्ट्रिय पुनर्निर्माण प्राधिकरण सरकारी कार्यालय पुनर्निर्माण अन्तर्गत कर्मचारी निवास, बैठक कक्ष (पुरुष, महिला छुट्टाछुट्टै) र अपाङ्गमैत्री शौचालय साथै रुफटफ गार्डेनसहितको सुविधा सम्पन्न भवन निर्माण गरिएको हो ।

आर्थिक वर्ष २०७२/७३ मा निर्माण कार्यको लागि सम्झौता भएकोे भवन गएको वैशाख महिनामा सम्पन्न भएको थियो । १३ करोड, ८ लाख ५७ हजार ६ सय ४४ रुपैयाँमा सम्झौता भएको पाँच वटा भवन मूल्य अभिवृद्धि कर बाहेक १२ करोड ६८ लाख ७१ हजार ८ सय ३१ रुपैयाँमा सम्झौता भएको भन्दा कम लागतमा सम्पन्न भएको हो । यो भवन निर्माणको जिम्मा सुनकोशी खानी थोदुङ जेभी काठमाण्डौले पाएको थियो ।

भूकम्पले तीन सरकारी कार्यालयको भवन ध्वस्त पारेपछि खानेपानी डिभिजन कार्यालय भाडाको घरमा सञ्चालन हुँदै आएको थियो । त्यस्तै शहरी विकास डिभिजन कार्यालय आफ्नै जमिनमा कटेज निर्माण गरी दुःखका साथ कार्यालय सञ्चालन गर्दै आएको थियो भने प्रमुख जिल्ला अधिकारीको आवास भवन नहुँदा जिल्ला प्रशासन कार्यालयमै बस्दै आएका थिए । अब सबै कार्यालयको सुविधा सम्पन्न भवन निर्माण भएपछि दैनिक कामकाजमा सहज हुने आशा कार्यालयले लिएको छ ।