विदेशबाट फर्किएपछि गाउँमै व्यावसायिक बाख्रापालन

जेठ ३०, २०७६ बिहीबार १३:८:४९ | रासस

गुल्मी – विदेशबाट फर्किएर गुल्मीमा युवाले व्यवसायिक बाख्रा पालन थालेका छन् ।

स्वदेशमा बसेर काम गर्नुभन्दा विदेश गएपछि मनग्य कमाइ हुन्छ भन्ने सपना बोकेर विदेशिएका गुल्मी मालिकाका मधुसुदन भट्टराई, ऋषिराम, रेग्मी र राजु रेग्मीले व्यवसायिक बाख्रा पालन गरेका हुन् ।

पाँच वर्ष छिमेकी देश भारत र दश वर्ष कतारमा पसिना बगाएर फर्किनुभएको हो मधुसुदन भट्टराई । त्यस्तै तीन वर्ष मलेसिया बसेर फर्किएका हुन् ऋषिराम रेग्मी र राजु रेग्मी ।

गाउँमा आफ्नै दाजुभाइ कपिल रेग्मी र खिमलाल रेग्मीसँगै पाँच युवा मिलेर मालिका–मदाने कृषि उत्पादन तथा वितरण उद्योगको नाममा फार्म दर्ता गरेर उनीहरुले व्यावसायिक रूपमा बाख्रापालन गर्न शुरु गरेका हुन् ।

‘विदेशमा बसेर काम गर्नुभन्दा आफ्नै देशमा सजिलो र परिवारसँगै सुखदुःख साटासाट गररे काम गर्दा मन पनि निकै खुशी हुन्छ,’ १० वर्ष विदेश बसेर फर्किएका कपिल रेग्मी भन्नुहुन्छ ।

शुरुमा आफ्नै घर र वरपरबाट जम्मा गरेर स्थानीय जातका १७ बाख्राबाट व्यवसाय शुरु गरेका हुन् । वर्षौ‌सम्म विदेशमा काम गर्दा पनि भनेजस्तो राम्रो कमाइ गर्न सकिएन, त्यसैले स्वदेशमै फर्किएर केही गर्नुपर्छ भन्ने लागेर घर फर्कने निधो गरेको हूँ, अहिले केही गर्नुपर्छ भनेर यो पेशा शुरु गरेका छौं,’ अर्का युवा मधुसुदन भट्टराईले थप्नुभयो ।

उनीहरुले स्वदेशमा फर्किएपछि गाउँमै ऋणधन गरेर १६ लाख रुपैयाँ लागतमा बस्ने घरसहित बाख्रा फार्म स्थापना गरेको बताए । गत वर्षदेखि व्यावसायिकरूपमा बाख्रा फार्म शुरु गरेपछि यतिबेला उनीहरुको दिनचर्या बिहानदेखि बेलुकासम्म बाख्राको हेरचाहमा बित्न थालेको छ ।

उनीहरुले पालेका बाख्रा स्थानीय जातका भएका कारण अन्य जातका बाख्राको तुलनामा केही साना छन्् । तर साना भए पनि गाउँघरमा पूजाआजामा चढाउनका लागि स्थानीय बाख्राको आवश्यकता पर्ने भएका कारण मूल्य पनि अन्य बाख्राको तुलनामा स्थानीय बाख्राको राम्रो पर्ने गरेको उनीहरुको अनुभव छ ।

व्यावसायिकरूपमा बाख्रापालन गरेपछि उनीहरुले प्रदेशअन्तर्गत भूमि व्यवस्था कृषि तथा सहकारी मन्त्रालयबाट चार लाख रुपैयाँ र स्थानीय मालिका गाउँपालिकाबाट ५० हजार रुपैयाँ अनुदान रकमसमेत प्राप्त गरेका छन् ।

उक्त रकम उनीहरुले बाख्राको व्यवस्थापन र केही रकम भौतिक व्यवस्थापनमा खर्चिएको बताए ।

सरकारले दिएको अनुदान भनेको खानलाई मात्र होइन, केही गरेर देखाउनुपर्छ भनेर ती युवाले शुरु गरेको कामबाट आफू पनि प्रभावित बनेको बताउनुहुन्छ, कृषि ज्ञानकेन्द्र गुल्मीका प्रमुख अम्मरराज शर्मा घिमिरे । उहाँले स्थानीय जातका बाख्राको संरक्षण गर्न सकेमा यसबाट मनग्य आम्दानी र फाइदा दुवै लिन सकिने बताउनुभयो ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्