नेपालद्वारा पहिलो पटक टी–२० अन्तर्राष्ट्रिय सिरीज ‘क्लिन स्विप’

असार २९, २०७६ आइतबार ११:२४:९ | उज्यालो सहकर्मी

नेपालले पहिलो पटक टी–२० अन्तर्राष्ट्रिय सिरीज क्लिन स्विप गरेको छ । आईसीसी टी–२० विश्वकप एसियाली छनोट प्रतियोगिताको लागि अभ्यास भ्रमणमा मलेसिया पुगेको नेपालले त्यहाँ दुई खेलको टी–२० सिरिज खेलेको थियो ।

पहिलो खेलमा नेपालले मलेसियालाई सात विकेटले हरायो भने आइतबार भएको दोस्रो खेलमा ६ रनको जित हात पार्‍यो ।

यो सिरिजमा नेपालले ब्याटिङ र बलिङ दुबैतर्फ सन्तुलित प्रदर्शन गर्‍यो । क्वालालम्पुरस्थित किनरारा ओभल मैदानमा भएको खेलमा १७४ रनको लक्ष्य पछ्याएको मलेसियालाई नेपालले २० ओभरमा सात विकेटको क्षतिमा १६७ रनमा सीमित गर्‍यो।

अन्तिम ओभरमा मलेसियालाई जितका लागि १४ रन आवश्यक थियो भने क्रिजमा ठूला सट खेलिरहेका मोहमद सहदत थिए । तर अभिनाश बोहराले अन्तिम ओभरमा तीन डट बल फाल्दै सात रनमात्र दिएपछि नेपालले ६ रनको जित हात पारेको हो ।

मलेसियाका ओपनर विरानदीप सिंह र शइद अजिजले पहिलो विकेटका लागि ७५ रनको बलियो साझेदारी गरेपछि घरेलु टिमले दरिलो सुरुवात गरेको थियो । विरानदीप २३ रन बनाएर अभिनाश बोहराको बलमा विकेटकिपर विनोद भण्डारीबाट क्याचआउट हुँदा नेपालले पहिलो सफलता हात पारेको थियो ।

त्यसपछि कप्तान अहमद फाइजलाई १७ रन बनाएपछि सन्दीप लामिछानेले क्याचआउट गराए । अमिनुद्धिन रामलीले ११ बलमा २४ रन बनाएर मलेसियाको इनिङ उकासेका थिए । उनलाई कप्तान पारस खड्काले आउट गरेपछि छैटौँ सफलता हात पारेको थियो । सइद अजिजले पनि ३७ बलमा ५० रन बनाए । पछिल्ला क्रमका ब्याट्सम्यानहरुले केही ठूला सटहरु खेले ।

छैटौं नम्बरमा ब्याटिङमा आएका विकेटकिपर विनोद भण्डारीले विष्फोटक ब्याटिङ गरी २५ बलमा ५१ रनको अविजित अर्धशतकीय पारी खेलेपछि नेपालले निर्धारित ओभरमा ६ विकेट गुमाएर १७३ रनको ठूलो योगफल बनाउन सकेको हो । भण्डारीले ३ चौका र ५ छक्का प्रहार गरेका थिए ।

किनरारा ओभल मैदान टस जितेर पहिले ब्याटिङ गरेको नेपालका लागि आइतबारको खेलमा कप्तान पारससँग युवा ब्याट्सम्यान पवन सर्राफले ओपनिङ गरेका थिए । यो जोडीले ३४ रनको साझेदारी गरेको थियो । पाँचौं ओभरमा पवन १० रनको स्कोरमा रनआउटको शिकार भए ।

छैटौं ओभरको दोस्रो र तेस्रो बलमा उपकप्तान ज्ञानेन्द्र मल्ल र कप्तान पारस क्रमश: ७ र २३ रनमा आउट भएपछि नेपाल ४२–३ को कठिन स्थितिमा पुगेको थियो । यू–१९ कप्तान रोहितकुमार पौडेल र अनुभवि शरद भेषावकरले चौथो विकेटका लागि ४६ रनको ठोष साझेदारी गरेपछि नेपालको पारी उकासियो । रोहित २३ बलमा १९ रन बनाएर आउट भए । त्यसपछि आएका विनोद भण्डारीसँग मिलेर शरदले थप २९ रनको साझेदारी गरे । शरद २८ बलमा ४ चौका र २ छक्कासहित ४० रन बनाएर आउट भए ।

विनोदले करण केसीसँग मिलेर ३३ रनको साझेदारी गरेका थिए । करणले १० बलमा १ चौका र १ छक्कासहित १६ रन जोडे । विनोदले सोमपाल कामीसँग सातौं विकेटका लागि २३ रनको अविजित साझेदारी गरेका थिए ।

बलिङमा मलेसियाका फित्री सामले ३ विकेट लिए । सइद अजिज र सुव्रिम मुनिन्देले एक–एक विकेट लिए ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्