भारतबाट यात्रु ओसार्दै पर्यटन परमिटका बस

असोज १६, २०७६ बिहीबार ६:२९:४० | रासस

बाँके – पर्यटन परमिटको अनुमति पाएका नेपाली बसले भारतबाट दशैँ मनाउन घर फर्किने नेपाली यात्रु ओसार्न थालेका छन् । घर फर्किने नेपालीको सुविधाका लागि पर्यटन इजाजतका बसलाई समेत आगामी कात्तिक १५ गतेसम्मका लागि नेपालगञ्ज नाकाबाट भारतका शहरमा आउन जान रोक नलगाइएको बाँकेका प्रमुख जिल्ला अधिकारी कुमारबहादुर खड्काले जानकारी दिनुभयो ।

उहाँका अनुसार नेपाल–भारत मैत्री बसलाई मात्रै नेपालगञ्ज नाकाबाट भारततर्फ जान अनुमति भए पनि चाडपर्वलाई मध्यनजर गर्दै एक महिनाका लागि पर्यटन रुट परमिटको इजाजत पाएका बसलाई समेत अनुमति दिइएको हो ।

प्रदेश सरकार आन्तरिक मामिला तथा कानून मन्त्रालय बुटवलको अनुरोधमा विगतमा लगाइएको रोक एक महीनाका लागि खुला गरिएको उहाँको भनाइ छ । पर्यटन रुट परमिटका बसले अवैधरूपमा यात्रु ओसार्न थालेपछि नेपालगञ्जका होटल तथा यातायात व्यवसायीले भने त्यसको विरोध गर्दै आएका छन् ।

पर्यटकीय इजाजत लिएर भारतका विभिन्न शहरमा अवैधरूपमा यात्रु ओसारपसार गर्ने नेपाली बसलाई रोक्नका लागि सरोकारवाला निकायलाई पटकपटक अनुरोध गरेपछि रोकिए पनि अहिले फेरि चाडपर्वको नाममा चल्न दिनु दुःखद् भएको होटल व्यवसायी सङ्घ बाँकेका अध्यक्ष भीम कँडेलले बताउनुभयो । ‘पर्यटकका नाममा यात्रु ओसार्न पाइँदैन’, अध्यक्ष कँडेलले भन्नुभयो, ‘यी गाडी नेपालगञ्जमा रोक्दै नरोकी सिधै गन्तव्यमा जानाले यहाँका सबै व्यवसायीलाई मर्का परेको छ ।’ पर्यटन सुविधाको इजाजत लिएर यात्रुवाहक बस सञ्चालन गरिँदा यातायात व्यवसायीका लागि मात्रै नभई सिङ्गो नेपालगञ्ज शहर प्रभावित भएको नेपाल उद्योग वाणिज्य महासङ्घका केन्द्रीय सदस्य कृष्णप्रसाद श्रेष्ठले बताउनुभयो ।

भेरी यातायात प्रालिका अध्यक्ष राजेन्द्र गिरीले अवैधरूपमा सञ्चालन हुने यात्रुवाहक बसका कारण वैधानिकरूपमा सरकारको अनुमति लिएर सञ्चालन हुने नेपाल–भारत मैत्री बसलाई समेत समस्या हुने गरेको बताउनुभयो । उहाँले यो समस्या होटल व्यवसायीको एकछाक खाना एक रात बासको मात्र नभई समग्र व्यवसायसँग जोडिएको बताउनुभयो ।

यात्रु नेपालगञ्जमा होटलमा खाना खाने बास बस्नेदेखि अटो चढ्नेसम्मका सुविधाबाट वञ्चित भएको उहाँको भनाइ छ । नेपालगञ्ज बजार सुनसान हुँदै जाँदा यो अवैध कार्यले ठूलो नोक्सान पुर्‍याएको व्यवसायीको बुझाइ छ । व्यवसायीले प्रहरी प्रशासनको मिलेमतोमा अवैध कार्य भइरहेको भन्दै यसको विरोधमा सडकमै उत्रिने तयारी गरेको बताएका छन् ।

अन्तिम अपडेट: मंसिर २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्