बुंगल नगरपालिकाको केन्द्रसम्बन्धी विवाद झन चर्कियाे, स्थानीय आन्दोलित

असार ३१, २०७५ आइतबार १९:४६:४१ | डीबी बिष्ट

बझाङ - बुंगल नगरपालिकाको भवन कहाँ बनाउने भन्ने विषयमा स्थानीयहरु र जनप्रतिनिधिबीचकाे विवाद अझै चुलिएकाे छ ।

शनिबार स्थानीयहरुले जनप्रतिनिधिहरुलाई आक्रमण गर्न खोज्दा प्रहरी र स्थानीयबीच झडप हुँदा ५ जना स्थानीय २ जना प्रहरी गरी ७ जना घाईते भएका थिए ।

नगर परिषद्ले वडा नम्बर ५ मा नगरपालिकाको भवन बनाउने भन्ने निर्णय सर्वसम्मत गरेपछि स्थानीयहरुले वडा नम्बर ४ को विजगडामा नै भवन बन्नुपर्ने भन्दै नारा जुलुुससहित आइतबार विजगडाको बजार र सडक समेत बन्द गरेका छन् ।

जनप्रतिनिधिहरुले मनोमानी ढंगले निर्णय गरेको भन्दै आन्दोलन गर्नुपरेको उनीहरुको भनाई छ ।

शनिबार स्थानीय बासिन्दाले नगपरिषद्ले गरेको निर्णय समेत च्यातिदिएका थिए ।

जनताको आकंक्षा विपरित काम भैरहेको भन्दै स्थानीयहरु आन्दोलित भएको स्थानीय बासिन्दा सुरेश धामीले बताउनुभयो ।

आफ्ना माग पूरा नभए जस्तोसुकै आन्दोलन गर्न पनि आफूहरु तयार रहेको स्थानीयले बताए ।

बागथलादेखि विजगडासम्मको शाखा सडकमा यहाँका स्थानीयहरुले ठाँउ ठाँउमा ढुङ्गा तथन काठ फालेर अवरुद्ध गरेका छन् । त्यसैगरी बुंगल नगरपालिकाका मेयर धन बहादुर बिष्टको कार्यकक्षमा समेत तालाबन्दी गरेका छन् ।

केही स्थानीयले झापामा केन्द्र सार्नुपर्ने माग गरिरहेका र केहीले विजगडामा नै यथावत हुनुपर्ने भन्दै आएका थिए ।

तर शनिबार दिउँसो बसेकोे नगर सभाबाट विजगडा र झापाको बीचमा रहेको हाटकोटमा सार्ने सर्वसम्मत निर्णय भएपछि स्थानीयहरु आन्दोलनमा उत्रिएका हुन् ।

‘नगरपालिकाको कार्यालय नसार्न बारम्बार आग्रह गर्दा पनि नमानेपछि यस्तो अवस्था आएको हो’, स्थानीय अक्कल कुँवरले बताउनुभयो ।

नेपाली कांग्रेसका नेता प्रताप गुरुधामीका अन्सार भौगोलिक हिसाबले साबिकको कफलसेरी गाविस, पिपलकोट गाबिस , देउलीकोट र खिरातडी दहबगरलाई हेर्ने हो भने सबैलाई उपयुक्त हुने स्थान हाटकोट हो ।

विवादले मानवीय क्षति नहोस् भन्नका लागि बुंगल नगरपालिकामा प्रहरी परिचालन गरीएको जिल्ला प्रहरी कार्यलयले जनाएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्