मझगाउँ विमानस्थल सञ्चालन गर्न कुनै समस्या छैन : प्राविधिक टोली

 कात्तिक ३, २०७६ आइतबार ९:१५:३९ | दुर्गा उपाध्याय
unn.prixa.net

कञ्चनपुर  – कञ्चनपुरमा रहेको मझगाउँ विमानस्थल सञ्चालन गर्न कुनै समस्या नरहेको प्रारम्भिक अध्ययन टोलीले जनाएको छ । भौगोलिक र सुरक्षाका हिसाबलेसमेत विमानस्थल सुरक्षित रहेको बताउँदै प्राविधिक टोलीले विमानस्थल सञ्चालन गर्न कुनै समस्या नहुने जनाएको हो ।

तीन दिनसम्म विमानस्थलको प्रारम्भिक अध्ययन गरेको टोलीले महेन्द्रनगरमा पत्रकार सम्मेलन गर्दै ५० सिटका जहाज तत्कालै सञ्चालन गर्न निष्कर्ष निकालेको छ । प्राविधिक विषयमा गरिएको अनुसन्धानले विमानस्थल सञ्चालन गर्न कुनै समस्या नदेखिएको टोलीका संयोजक तथा इन्जिनियर गुरुदत्त अधिकारीले बताउनुभयो । ‘५० सिटका जहाज अवतरणमा कुनै समस्या छैन’, उहाँले भन्नुभयो ‘७२ सिटका जहानका लागि पनि थोरै प्रयास गरे सञ्चालन गर्न सकिन्छ ।’

उहाँले नजिक भारतीय सीमा र उत्तर–दक्षिण रनवे का कारण विमानस्थल सञ्चालन गर्न नसकिने भन्ने हल्ला सुनिएको बताउँदै त्यसले खासै प्रभाव नपर्ने बताउनुभयो । ‘हामी भारतीय सीमानाबाट पनि टाढा तीन किलोमिटर टाढा सुरक्षित ठाउँमा छौँ’, अधिकारीले भन्नुभयो ‘त्यस्तै, पहाडी क्षेत्रसँगको दूरी पनि टाढा रहेकाले उत्तर–दक्षिण रनवेले पनि खासै जहाज अवतरणमा कुनै समस्या पार्दैन ।’

यस्तै, शुक्लाफाँटा राष्ट्रिय निकुञ्ज रहेकाले विमानस्थल सञ्चालनबाट वन्यजन्तुमा पर्नेसक्ने प्रभावका बारेमा समेत टोलीले वातावरणीय प्रभाव मूल्यांकनका लागि प्रतिवेदनमा उल्लेख गर्ने जनाएको छ । 

विमानस्थलको सम्भाव्यताको अध्ययनका लागि गएको बिहीबार महेन्द्रगर पुगेको टोलीले चार महिनाभित्र प्रतिवेदन तयार पारी मन्त्रालयमा बुझाउनेछ । साथै, प्रतिवेदनमा विमानस्थल सञ्चालन गर्न सकिने देखिएमा पुनः विस्तृत अध्ययन तथा आवश्यक पूर्वाधारबारे अध्ययन गर्न अर्को टोली पठाउनेछ ।
 

अन्तिम अपडेट: कात्तिक १२, २०७६

दुर्गा उपाध्याय

दुर्गा उपाध्याय कञ्चनपुरका उज्यालो सहकर्मी हुनुहुन्छ । 

तपाईको प्रतिक्रिया