माैसम परिवर्तन : यी राेग लाग्लान्, यसरी बचाैँ

मंसिर ८, २०७६ आइतबार १६:२४:१० | उज्यालो सहकर्मी

काठमाण्डौ – अहिले बिस्तारै जाडो बढ्ने क्रममा छ । मौसम परिर्वतनले स्वास्थ्यमा नकारात्मक असर पुर्‍याइरहेकाे हुन्छ ।

माैसम परिवर्तनसँगै शारीरिक अवस्थामा पनि धेरै परिवर्तन भैरहेको हुन्छ । विशेषगरी यो मौसममा ब्याक्टेरियाका कारण ज्वरो, रुघाखोकी जस्ता सरुवा रोग लाग्ने सम्भावना उच्च रहन्छ ।

मौसम परिवर्तनको समयमा एक्कासी चिसो बढ्नुका साथै अत्याधिक प्रदूषण हुने भएकाले स्वास्थ्यमा देखापर्ने विभिन्न समस्या यही कारणले नै भएको हो भनेर यकिन गर्न कठिन हुन्छ ।

मौसम परिवर्तन भैरहेको समयमा जथाभाबी खाने र खानपानमा ध्यान नदिँदा बिरामी पर्नुका साथै अन्य इन्फेक्सन हुने सम्भावना पनि उत्तिकै हुन्छ । मौसम परिवर्तनको समयमा हाम्रो शरीरको रोगसँग लड्ने प्रतिरक्षात्मक क्षमता कम हुन सक्छ ।

यो मौसममा भाइरल संक्रमण वा ब्याक्टेरियाको इन्फेक्सन भएमा के गर्ने ?

शरीर कमजोर हुने, खाना खान मन नलाग्ने, वाकवाक लाग्ने, टाउको दुख्ने, हल्का ज्वरो आउने जस्ता लक्षण देखा पर्छ । यस्ता लक्षणहरु एक दुई दिनसम्म देखियो भने भाइरल इन्फेक्सन भएको हुन सक्छ ।

सामान्यरुपमा लाग्ने मौसमी रुघाखोकीको वास्ता गरिएन भने भविष्यमा जटिल रुप लिन सक्छ । कुनै पनि रोगको पहिलो लक्षण रुघाखोकी हुन सक्छ । यदि रुघाखोकीको समयमै उपचार हुन सकेन भने घाँटी, फोक्सो, कलेजो, पेट र टाउकोमा इन्फेक्सन हुन्छ ।

यस्ता संक्रमणबाट बच्न वा उपचारका लागि सर्वप्रथम रोगको पहिचान गर्नुपर्छ । यस्तो समयमा ज्वरो, रुघाखोकी आएमा भाइरल संक्रमण हो वा अन्य कारणले भएको हो, यो पत्ता लगाउनुपर्छ ।

भाइरल संक्रमण भएमा घरमै प्रशस्त मात्रामा शुद्ध पानी पिउने, हरियो सागसब्जी, फलफूल खानुपर्छ । तर बयाक्टेरियल इन्फेक्सन भएमा, लामो समयसम्म ठिक नभएमा चिकित्सकसँग परामर्श लिनुपर्छ ।

बच्ने उपाय

यस्ता संक्रमित रोगहरु सजिलै खोकी र खकारको माध्यमबाट अन्य व्यक्तिमा सर्न सक्छ । त्यसैले भिडभाडबाट टाढा बस्ने, शुद्ध पानी प्रशस्त मात्रामा पिउने, स्वस्थ्य खाना खाने र माक्स लागाएर हिँड्ने बानीको विकास गर्नुपर्छ ।

यो मौसममा रोग प्रतिरोधात्मक क्षमता कमजोर हुन्छ । त्यसैले ज्येष्ठ नागरिक र बालबालिकालाई संक्रमण छिट्टै हुने भएकाले ध्यान दिनुपर्छ ।

यस्ता समस्या हुनै नदिनका लागि अहिले बजारमा धेरै किसिमका भ्याक्सिन आइसकेका छन् । त्यस्ता भ्याक्सिनले रोगसँग लड्ने क्षमता बढाउँछ । साथै खानपिनमा पनि उत्तिकै ध्यान दिनुपर्छ । यस्ता रोगहरुलाई घरेलु खानपानले पनि कम गर्न सकिन्छ ।

शारीरिक व्यायाम वा हरेक दिन बिहान आधा घण्टा हिँड्ने बानीले पनि यस्ता समस्याबाट बच्न सकिन्छ । साथै आरामको पनि उत्तिकै जरुरी हुन्छ । सामान्यतया एक व्यक्ति स्वस्थ्य हुनका लागि दैनिक ६ देखि ७ घण्टा सुत्नैपर्ने हुन्छ ।

(अल्का अस्पतालमा कार्यरत जनरल फिजिसियन डा. प्रेम पाण्डेसँग साथी विना न्यौपानेले गरेको कुराकानीमा आधारित)

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्