साउदीको जेद्दामा ४१ जना नेपालीलाई कोरोना सङ्क्रमण, ६ जना निको भए

वैशाख २५, २०७७ बिहीबार १९:७:४७ | सन्जिता देवकोटा

काठमाण्डौ – साउदीको जेद्दा क्षेत्रमा ४१ जना नेपाली श्रमिकमा कोरोना सङ्क्रमण भएको छ । जसमध्ये ६ जना निको भएका छन् । बाँकी ३५ मध्ये कतिपय निको हुने चरणमा रहेको जेद्दास्थित नेपाली महावाणिज्य दूतावासका कार्यवाहक महावाणिज्यदूत रेवती पौडेलले उज्यालोलाई जानकारी दिनुभयो ।

‘सङ्क्रमितमध्ये कतिपय निको हुने चरणमा हुनुहुन्छ भने केहीको अस्पतालमा उपचार भइरहेको छ,’ महावाणिज्यदूत पौडेलले भन्नुभयो, ‘सबैको अवस्था सामान्य नै छ ।’

सङ्क्रमित सबैजसोसँग आफूले नियमित फोनमार्फत स्वास्थ्य अवस्थाबारे जानकारी लिइरहेको र सबैको अवस्था सामान्य नै रहेको महावाणिज्यदूत पौडेलले बताउनुभयो ।

उहाँका अनुसार उपचारत सबै नेपालीलाई खान, बस्न र अन्य आवश्यक सुविधामा साउदी सरकारले आफ्ना नागरिक र विदेशी भनेर विभेद गरेको छैन । निको हुने चरणमा रहेकालाई पनि खाना, फलफूलदेखि तातोपानी लगायत सबै व्यवस्था साउदीले नै गरेको छ ।

‘म आफैंले फोनमा कुरा गर्दा पनि उहाँहरुले हामीले राम्रो उपचार पाइरहेको बताउनुभएको छ,’ महावाणिज्यदूत पौडेलले भन्नुभयो, ‘आशा छ उहाँहरु पनि चाँडै नै निको हुनुहुनेछ ।’

साउदी सरकारले गुणस्तरीय उपचार गरिरहेकाले साउदीमा सङ्क्रमित हुने नेपालीका परिवारलाई नआत्तिन र चिन्ता नलिन पनि उहाँले आग्रह गर्नुभएको छ । बरु आफ्ना मानिसलाई साउदी सरकार र दूतावासले जारी गरेका सूचना पढ्न र नियम मान्नका लागि हौसला दिन उहाँले आग्रह गर्नुभयो ।

साउदीले सङ्क्रमितको राष्ट्रियता खुलाउने गरेको छैन । तर महावाणिज्य दूतावासमा विभिन्न माध्यममार्फत सङ्क्रमित ४१ जना नेपालीको जानकारी प्राप्त भएको उहाँले बताउनुभयो ।

योसँगै साउदीमा दूतावासको जानकारीमा आएअनुसार सङ्क्रमित नेपालीको सङ्ख्या ४६ पुगेको छ । जसमध्ये ११ जना निको भएका छन् ।

साउदीले कोरोना सङ्क्रमित आप्रवासी श्रमिकको सङ्ख्या धेरै भएकाले उच्च सतर्कता अपनाउन भनेको छ ।

महावाणिज्य दूतावासमा मात्र दिनमा झण्डै एकसय कल

महावाणिज्यदूत पौडेलका अनुसार अहिले कोरोनाको जोखिम बढेसँगै दूतावासमा आफ्नो समस्या र गुनासासहित दिनमा झण्डै एक सय जनाले फोन गर्ने गरेका छन् । गुनासा र समस्या अनुसार कम्पनी, रोजगारदातासँग समन्वय गर्ने काम गरिरहेको पनि उहाँले बताउनुभयो ।

दूतावासले अहिले दैनक तीन सिफ्टमा काम गरिरहेको छ । श्रमिकका लागि नै २४ घण्टे हटलाइन नम्बर र श्रमिकको गुनासो सुन्नकै लागि दुई जना कर्मचारी खटाइएको दूतावासले जनाएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सन्जिता देवकोटा

उज्यालोमा कार्यरत सन्जिता देवकोटा वैदेशिक रोजगार र नेपाली महिलाका बिषयमा कलम चलाउनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्