सांसदको कोरोना परीक्षणको रिपोर्ट दिउँसो ३ बजे आउने

वैशाख २६, २०७७ शुक्रबार ११:५०:० | उज्यालो सहकर्मी

काठमाण्डौ – संसद्को बजेट अधिवेशनको तयारी लगभग पूरा भएको संसद् सचिवालयले जनाएको छ । आज दिउँसो ४ बजेपछि सुरु हुने दुवै सदनको बैठकका लागि आवश्यक तयारी पूरा भएको र कुनै समस्या पर्न नदिन सुक्ष्म अध्ययन भइरहेको संसद् सचिवालयका सहायक प्रवक्ता दशरथ धमलाले जानकारी दिनुभयो ।

बैठकमा सहभागी हुने सांसदहरुको स्वास्थ्य परीक्षण भइरहेको छ । अहिलेसम्म दुई सय ६८ सांसदको स्वाब परीक्षण भएको छ । तीन सय३४ सांसदमध्ये चार जना निलम्बनमा परेका छन् भने स्वाब परीक्षण गर्न बाँकी ३० जनामा कोही काठमाण्डौ उपत्यकाबाहिर र कोही कार्य व्यवस्तताले परीक्षणमा सहभागी भएका छैनन् । छुटेका केही भने परीक्षणका लागि आउँदै गरेको सचिवालयले जनाएको छ ।

सचिवालयले स्वास्थ्य परीक्षण नगरि बैठकमा बस्न नदिने नियम बनाएकाले बैठक बस्नुअघि सबैको परीक्षण हुने छ । यस्तै बैठकमा प्रत्यक्ष सरोकार राख्ने कर्मचारीको पनि स्वाब परीक्षण भइरहेको छ । परीक्षण गराएका सबैको रिपोर्ट दिउँसो ३ बजेसम्म आइसक्ने सचिवालयका सहायक प्रवक्ता दशरथ धमलाले जानकारी दिनुभयो । रिपोर्टमा नेगेटिभ नतिजा आएकालाई मात्रै बैठकमा प्रवेश दिइनेछ ।

यस्तै सांसदलाई दुई सिट छोडेर बस्ने तथा अधिवेशन अवधिभर एउटै सिटमा बस्ने व्यवस्था मिलाइएको छ । प्रधानमन्त्री, मन्त्री तथा दलका नेताबाहेक सांसदले रोस्ट्रम प्रयोग नगर्ने, संसद् भवनमा प्रवेश गर्दा र फर्कँदा फरक ढोकाको प्रयोग गरिने, क्यान्टिन र सभा हलबाहिर पनि भिडभाड नगर्ने, दर्शक दीर्घामा कसैलाई पनि प्रवेश नदिइने, सञ्चारमाध्यमलाई सचिवालयले फोटो उपलब्ध गराउने संसद् सचिवालयले जनाएको छ ।

यस्तै बैठक कक्ष प्रवेश गर्दा अनिवार्य रुपमा साबुन पानीले हात धुनुपर्ने, बैठक अवधिभर सबैले मेडिकल माक्स (मुखावरण) को प्रयोग अनिवार्य गर्नुपर्नेलगायत नियम बनाइएको सचिवालयले जनाएको छ । सांसदको कोरोना परीक्षणको रिपोर्ट आएपछि मात्र संसद्को बजेट अधिवेशन सुरु हुनेछ ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्