बृहत् गुरुयोजना बनाएर अयोध्याधामको काम सुरु गर्न प्रधानमन्त्रीको आग्रह

 साउन २५, २०७७ आइतबार ६:१९:३१ | रासस
unn.prixa.net

काठमाण्डौ - प्रधानमन्त्री केपी शर्मा ओलीले बृहत् गुरुयोजना नै बनाएर भगवान् श्रीरामको जन्मस्थल अयोध्याधामको काम सुरु गर्न चितवन माडीका जनप्रतिनिधिलाई आग्रह गर्नुभएको छ ।

प्रधानमन्त्री निवास बालुवाटारमा शनिबार चितवनको माडी नगरपालिकाका प्रमुखलगायत जनप्रतिनिधिसँगको छलफलमा प्रधानमन्त्रीले रामको जन्मभूमि नेपालमा नै भएकाले बृहत् योजनाका साथ काम सुरु गरिहाल्न आग्रह गर्नुभएको माडी नगरपालिकाका उपप्रमुख ताराकुमारी काजी महतोले जानकारी दिनुभयो ।

उहाँकाअनुसार प्रधानमन्त्रीले अयोध्यापुरीमा राम, लक्ष्मण, सीता र हनुमानको मूर्तिसमेत राखी आउँदो रामनवमी भव्यताका साथ मनाउने बताउनुभएको थियो । ऐतिहासिक तथ्य र प्रमाणका आधारमा राम जन्मभूमि माडीको अयोध्यापुरीमै भएको हो भन्दै प्रधानमन्त्रीले मन्दिर निर्माणलगायत काममा सरकारका तर्फबाट पनि सहयोग उपलब्ध हुने बताउनुभएको उपप्रमुख महतोले उल्लेख गर्नुभयो ।

माडीमा सहज यातायातका लागि समेत असुविधा भएको जनाउँदै स्थानीय जनप्रतिनिधिले वैकल्पिक उपाय अपनाएर भए पनि सडक निर्माण गर्नुपर्ने र त्यसका लागि सङ्घीय सरकारले सहजीकरण गरिदिनुपर्ने माग प्रधानमन्त्रीसमक्ष राखेका थिए ।

स्थानीय जनप्रतिनिधिको मागलाई सकारात्मक रुपमा लिँदै प्रधानमन्त्रीले आवश्यक निर्णय गरिने विश्वाससमेत दिलाउनुभएको उपप्रमुख महतोले जानकारी दिनुभयो । केही दिन पहिले चेपाङ समुदायको घर राष्ट्रिय निकुञ्जले जलाइदिएको जनाउँदै उनीहरुको उचित बसोबासको व्यवस्था गरिदिन जनप्रतिनिधिले प्रधानमन्त्रीलाई आग्रह गरेका थिए ।

त्यस आग्रहलाई सकारात्मक रुपमा लिँदै प्रधानमन्त्रीले वन तथा वातावरण मन्त्रालय र निकुञ्ज कार्यालयलाई आवश्यक निर्देशन दिइने बताउनुभएको थियो ।

अन्तिम अपडेट: साउन २९, २०७७

2 Comments

  • Deepak Simkhada

    Aug. 9, 2020, 9:12 a.m.

    देशमा नागरिक खान नपाएर दिनकादिन दयनीय स्थितिमा पुगिसकेको बेला त्यसलाई चाहिं अहिले मन्दिर बनाउनु परेको छ ...भगवान त सबै नेपालीको मनमा हुनुहुन्छ, ध्यान जावस यस कुरामा प्रधानमन्त्री के पी ओलीको /

  •  0 Reply
  • शिव भट्टराई

    Aug. 9, 2020, 6:52 a.m.

    अरु सबै भयो अब लङ्‌का कता बनाउने होला ? प्रधानमन्त्रि ज्यू! "काम कुरो एकातिर प्रधानमन्त्रि अयोध्यातिर"

  •  0 Reply

तपाईको प्रतिक्रिया