भारतीय विदेश सचिव हर्षवर्द्धन काठमाण्डाैमा

 मंसिर ११, २०७७ बिहिबार १२:०:२६ | उज्यालो सहकर्मी
unn.prixa.net

काठमाण्डौ – भारतीय विदेश सचिव हर्षवर्द्धन श्रृंगला आज नेपाल आइपुग्नुभएको छ । उहाँ केही बेरअघि चार्टर विमानमार्फत त्रिभुवन अन्तर्राष्ट्रिय विमानस्थलमा अवतरण गर्नुुभएको हो ।

भारतीय विदेश सचिवको नेपाल भ्रमण सामान्य कूटनीतिक भ्रमणको रुपमा मात्रै हेरिदै आएको भए पनि यो पटकको उहाँको भ्रमणलाई विशेष चासोका साथ हेरिएको छ । दुईदिने नेपाल भ्रमणका क्रममा सीमा विवादलाई मुख्य प्राथमिकतामा राखेर कुरा गर्ने नेपाल पक्षको तयारी छ ।

तर, यो विषयका कुरा नै नगर्ने पक्षमा भारत रहेको छ । नेपालले लिपुलेक, कालापानी र लिम्पियाधुराको भुभाग समेटेर नयाँ राजनीतिक नक्सान सार्वजनिक गरेसँगै भारत र नेपालबीचको सिमा विवाद सतहमा आएको छ । आज नै सचिवस्तरीय बैठकसमेत हुने भएकोले प्रधानमन्त्री केपी शर्मा ओलीको निर्देशन अनुसार नेपालको कालापानी, लिपुलेक र लिम्पियाधुराको भौगोलिक अवस्थिति र प्रमाणिक आधारमा नेपालले सार्वजनिक गरेको नयाँ राजनीतिक नक्साबारे बैठकमा छलफल गर्ने तयारी भएको बुझिएको छ ।

काठमाण्डाैको एक होटलमा द्विदेशीय सचिवस्तरीय संयन्त्र बैठक बसेपछि उहाँले प्रधानमन्त्री ओली र राष्ट्रपति विद्यादेवी भण्डारीसँग शिष्टाचार भेट गर्ने कार्यक्रम छ । यस्तै उहाँ र परराष्टमन्त्री ज्ञवालीबीच पनि भेटघाट हुने परराष्ट्र मन्त्रालयले जनाएको छ । विदेश सचिव श्रृंगला नेपालको भ्रमण सकाएर भोलि दिउँसो १ बजे भारत फर्कने कार्यक्रम रहेको छ ।

अन्तिम अपडेट: मंसिर १२, २०७७

तपाईको प्रतिक्रिया