इलाम चालिस वर्षपछि भारतीय जेलबाट मुक्त हुनुभएका इलामका दुर्गाप्रसाद तिम्सिनाले आमालाई भेट्नुभएको छ । आइतवार दिउँसाे घरमा पुगेपछि दुर्गाप्रसादले ८५ वर्षीया आमालाई भेटेर मिठाई खुवाइदिनुभयो । 

छोरालाई भेटेपछि आमा धनमाया तिम्सिनाले छोरो आउँछ भनेर बाटो हेरिरहेको र अहिले छाेराे घर आइपुग्दा खुसी लागेको बताउनुभयो । 

चालीस वर्ष भारतको कोलकातामा रहेकाे दमदम जेलमा विना सुनुवाइ बिताउनुभएका इलामको माई नगरपालिका १० का ६१ वर्षीय दुर्गाप्रसाद तिम्सिना घर पुग्नुभएकाे हाे । 

कोलकाता उच्च अदालतका न्यायाधीशद्वय ठोटविल बी राधाकृष्णन् र अनिरुद्र रोयको आदेशमा काकाका छोरा प्रकाशचन्द्र तिम्सिनाको रोहवरमा शनिवार उहाँलाई दमदम कारागारले रिहा गरिदिएको थियो ।

दुर्गाप्रसाद घर पुग्दा उहाँलाई हेर्न गाउँलेहरू जम्मा भएका थिए ।