काठमाण्डाै - २०७२ सालको भूकम्पबाट क्षतिग्रस्त विद्यालयको पुनर्निर्माण आउँदो असारभित्रै सकिने भएको छ ।

राष्ट्रिय पुनर्निर्माण प्राधिकरण अन्तर्गतको केन्द्रीय आयोजना कार्यान्वयन एकाइ (शिक्षा)ले पत्रकार सम्मेलन गरेर असारसम्म सबै विद्यालयको पुनर्निर्माण सकिने जानकारी दिएको छ ।  

भूकम्पमा ३१ जिल्लाका नौ हजार ७२ विद्यालयका ५४ हजार ५ सय ८४ कक्षाकोठामा क्षति पुगेको थियो । क्षतिग्रस्त भएकामध्ये ३ सय २७ वटा विद्यालय गाभिएका छन् भने १ सय ५३ वटा विद्यालय सञ्चालनमा छैनन् । क्षतिग्रस्तमध्ये सात हजार ५ सय ५३ वटा विद्यालय भवन पुनर्निर्माण हुनुपर्नेमा अहिलेसम्म ६ हजार २ सय ४६ वटा भवनको पुनर्निर्माण भइसकेको छ ।

आयोजनाका निर्देशक रामशरण सापकोटाले बाँकी रहेका एक हजार ३ सय ७ वटा विद्यालय भवनको आउँदाे तीन महिनाभित्र निर्माण सम्पन्न भइसक्ने बताउँदै  पुनर्निर्माण कार्य पूर्ण भएको समेत घोषणा गर्नुभयो । उहाँले विद्यालय भवनका ४८ हजार ७ सय ११ कक्षाकोठा निर्माण गर्नुपर्नेमा अहिलेसम्म ३५ हजार ५८ कक्षाकोठा निर्माण भइसकेको र अब १३ हजार ६ सय ५३ कक्षाकोठा निर्माणाधीन रहेको जानकारी दिनुभयो ।

पुनर्निर्माण गरिएका विद्यालयमा दुई हजार ७ सय ७ शौचालय र २ सय १६ खानेपानीका कार्य पनि सम्पन्न गरिएको छ । विद्यालय भवन पुनर्निर्माणका लागि एक खर्ब १० अर्ब ७९ करोड ७४ लाख रुपियाँ आवश्यक पर्नेमा अहिलेसम्म ५३ अर्ब १९ करोड ३९ लाख रुपियाँ खर्च भइसकेको छ । 

एकाइका आयोजना उपनिर्देशक डा. युवराज पौडेलले जग्गाको उपलब्धता लगायतका कारण सबै विद्यालयलाई पुनर्निर्माणमा समेट्न नसकिएको बताउँदै भन्नुभयो, ‘छुटेका विद्यालयलाई आउँदाे वर्ष शिक्षा, विज्ञान तथा प्रविधि मन्त्रालयले पुनर्निर्माणलाई अगाडि बढाउनुपर्दछ ।’