१५ दिनको बजार अनुगमनमा झण्डै साढे सात लाख रुपैयाँ जरिवाना असुल

जेठ २१, २०७८ शुक्रबार ६:५४:३० | उज्यालो सहकर्मी

सरकाले १५ दिनको बजार अनुगमनको क्रममा सात लाख ३७ हजार रुपैयाँ जरिवाना असुल गरेको छ ।

गएको वैशाख १६ देखि ३१ गतेसम्म काठमाण्डौ उपत्यकासहित देशका विभिन्न ठाउँमा गरेको अनुगमनमा कालोबजारी गर्ने र उपभोक्ता ठगी गर्ने ३६ व्यवसायीलाई कारबाही गरी सात लाख ३७ हजार रुपैयाँ जरिवाना असुल गरेको वाणिज्य, आपूर्ति तथा उपभोक्ता संरक्षण विभागका सूचना अधिकारी तथा प्रवक्ता शिवराज सेढाईँले जानकारी दिनुभयो । उहाँले निषेधाज्ञा सुरु भएदेखि नै बजार अनुगमनलाई प्रभावकारी बनाएको दाबी गर्नुभएको छ ।

नियमित जस्तै हुँदै आएको बजार अनुगमनलाई वैशाख १६ गतेदेखि वैशाख मसान्तसम्म थप प्रभावकारी रुपमा अनुगमन गरिएको थियो । विशेषगरी खाद्य र औषधि पसलमा गरिएको अनुगमनबाट ३६ जना व्यवसायी कारबाहीमा परेका हुन् ।

विभागले जेठ महिना सुरु भएपछिको तथ्याङ्क भने सार्वजनिक गरेको छैन । विभिन्न जिल्लाहरुमा, प्रमुख जिल्ला अधिकारीको नेतृत्वमा अहिले पनि निरन्तर अनुगमन चलिरहेको र यो अवधिमा पनि धेरैलाई कारबाही गरिएको विभागले जनाएको छ ।

अनुगमनको क्रममा गएको वर्ष जस्तो कृत्रिम अभाव सिर्जना गर्ने, मनपरि भाउ बढाउने जस्ता धेरै घटना नभेटिए पनि केही व्यापारी तथा फर्महरुले भने त्यस्ता क्रियाकलाप गरेको भेटिएको छ । विभागका सूचना अधिकारी तथा प्रवक्ता सेढाईँले भन्नुभयो . ‘खानेतेल लगायत केही दैनिक उपभोग्य वस्तुको भाउ बढेको भनेर उपभोक्ताले गरेका गुनासो सही हो । तर खानेतेलको भाउ एक्कासी बढेको होइन । अघिल्लो वर्षदेखि नै निरन्तर बढिरहेको छ । ’

सम्बन्धित व्यवसायीलाई पटक-पटक मूल्यवृद्धिको कारणबारे सोधिएको विभागले जनाएको छ । विभागका अनुसार उनीहरुले कच्चा पदार्थको भाउ बढेकाले मूल्य बढेको बताएका छन् । यस्तै विभागले व्यक्तिगत रुपमा २१ वटा सम्बन्धित उद्योगलाई भाउ बढ्नुको कारणबारे सोधेको छ । साथै उनीहरुको आयात र बिक्रीवितरणको बारेमा पनि जानकारी लिइएको छ । अनुगमनको क्रममा वस्तुको उपलब्धता सामान्य र सहज तरिकाले नै भइरहेको पाइएको छ । तर मूल्य बढेको भनेर केही गुनासो आएको छ ।

केही दिन अगाडि पनि भाउ बढाएको भनेर तीन वटा खाने तेल उद्योगलाई कारबाही गरिएको थियो । अहिलेको अनुगमन मूल्य र गुणस्तर केन्द्रीत गरिएकाले त्यहीअनुसार कारबाही पनि भइरहेको छ ।

कालोबजारी वा ठगी गरेमा के कारबाही हुन्छ ?

कुनै पनि कम्पनी वा व्यापारीले ठगी गरेको छ भने नेपाल प्रहरीले उतिखेरै स्थलगत रुपमा नै कारबाही गर्छ । कालोबजारी गरेमा जिल्ला प्रशासन कार्यालयले आफ्नो मातहतमा रहेर कारबाही गर्ने व्यवस्था छ । उपभोक्ता संरक्षण ऐनमा ६ लाख रुपैयाँ जरिवाना वा ६ वर्ष कैद अथवा दुवै सजाय हुन सक्ने व्यवस्था छ ।

यस्तै त्यस्ता व्यवसायीको कारोबार बन्द गर्ने र थुनामा राख्नेसम्मको कारबाही हुन सक्ने व्यवस्था छ ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्