काठमाण्डाै – अफगानिस्तानको सत्ता कब्जा गरेको तालिबान समूहले पञ्जशिर उपत्यकालाई पनि पूर्णरूपमा नियन्त्रणमा लिएको दाबी गरेको छ । तालिबानका प्रवक्ता जबिउल्लाह मुजाहिदले एउटा विज्ञप्ति निकालेर नियन्त्रणमा लिन बाँकी रहेको पञ्जशिर उपत्यका पनि नियन्त्रणमा लिएकाे बताएका बीबीसीले जनाएको छ ।

तर पञ्जशिरमा तालिबानविरुद्ध लडिरहेको विरोधी बल नेशनल रेसिस्टेन्स फ्रन्ट (एनआरएफ) ले भने तालिबानको दाबीलाई अस्वीकार गरेको छ । एनआरएफका प्रवक्ता अली मेसमले अहिले पनि आफूहरू तालिबानविरुद्ध लडिरहेको भन्दै तालिबानको दाबी गलत भएको बताएका बीबीसीले जनाएको छ ।

सामाजिक सञ्जालमा सार्वजनिक भइरहेका तस्बिरहरूमा तालिबान लडाकु प्रान्तीय गभर्नरको कम्पाउन्डको ढोका अगाडि उभिरहेको देखिएका खबरमा उल्लेख छ । हिजो आइतवार विरोधी गुटको नेता अहमद मसूदले आफूहरू शान्तिवार्ताका लागि इच्छुक भएको बताएका थिए ।

तालिबानले निकालेको विज्ञप्तिमा देशका सबै भूभाग आफूहरूले नियन्त्रणमा लिएकाे भन्दै अफगान नागरिकले अब शान्तिपूर्ण, समृद्ध जीवन, स्वतन्त्रताको आनन्द र भाइचारा प्राप्त गर्ने बताएको छ ।