‘यो दसैँमा म घर आइँन, सम्झनालाई पठाउन केही पाइँन’

भदौ ३१, २०७८ बिहीबार १७:१९:४० | मेरो कथा मेरो भोगाई

रमेश क्षेत्री/सिसेल्स ।

यसपालि दसैँको बारेमा हरेकको आफ्नै खालको सम्झना हुन्छ । तर परदेशीलाई त दसैँ नजिकिँदै गर्दा त्यही सम्झनाले असाध्यै सताउँछ । घरको सम्झना आउँछ । दसैँको टीका र जमरा सम्झँदा मन रमाउँछ । अनि फेरि जान नपाउने कुरा सम्झँदा दुःख लाग्छ ।

भदौ सकिएर असोज लाग्दै छ । बिहानी घामको झुल्कोले पनि अहिले त दसैँको झल्को दिन्छ । दसैँ आउनै लाग्दा कस्तो रापिलो, कस्तो मनै फुरुङ्ग हुने घाम लाग्छ । गाउँघरमा त अझ माहौल नै फरक हुन्छ ।

देश विदेशमा रहेका आफ्ना आफन्तहरू आउने खबर आउँछ । उनीहरूको स्वागतका लागि बाटो चिटिक्क पारिन्छ । सफा गरिन्छ । रातो माटो र सेतो कमेरोले घर पोतिन्छ । पिङ हाल्न डोरी बाटिन्छ । नयाँ लुगा सिलाउन दिइन्छ । आहा सम्झँदा पनि कस्तो मन फुरुङ हुन्छ ।

त्यही क्षणहरू आज पैसा कमाउन परदेशिएको म परदेशीले सम्झँदा मनमा पिर पर्छ । घर छाडेर परदेश लागेको पनि एक दशक भयो । सायद यो निधारमा दसैँको टीका नपरेको पनि एक दशक नै भयो ।

सम्झना त त्यो बेलाको आउँछ जति बेला दिदी बहिनी घर सिँगार्नु लाग्दा हामी हिमालबाट झारिएका च्याङ्‍ग्रा लिन जान्थ्यौँ । च्याङ्‍ग्रा लिन जानेको पनि लाइन नै हुन्थ्यो । कति रमाइलो हुन्थ्यो ।

अहिले त परदेशमा छु । आफूलाई न दसैँ न तिहार । मनमा सम्झनाको भेल छ । तर यहाँ त्यही सम्झनामा डुबेको परदेशीको बेहाल छ ।

यो कोरोनाले दसैँ तिहार सबै कुरा सम्झनामा मात्र सीमित बनाइदियो । महामारी सुरु भएदेखि घर आउने रहर पनि मन मनै मार्न परेको छ । यात्रा गर्न सजिलो छैन । अनेक झन्झट गर्न पर्छ ।

हुन त गाउँ घरमा पनि हामी परदेशी नजाँदा चाडबाड पहिलेजस्तो हुन्न होला । तर पनि घरहरूले रूप फेर्नेछन् । बाटो पनि सिँगारिने छन् । अहिले त प्रविधिले अलिक सजिलो पनि बनाएको छ । भेट नभए पनि भिडियोमा सबै कुरा देख्न पाइन्छ । त्यही खुसी लाग्छ ।

मन त घर जाने छ नि । तर के गर्नु परिस्थिति त्यस्तै छ । त्यसैले हामी जहाँ छौँ सुरक्षित हिसाबले चाडबाड बनाउन आवश्यक छ । ज्यान रहे भेट त अर्को साल होला नि भनेर मन बुझाउँदै छु परदेशमा ।

गाउँदै छु यही गीत,

‘यो दसैँमा म घर आइँन, सम्झनालाई पठाउन केही पाइँन

रुमालै छ चिनो, गाउँघरको मायालाई सोध्या छ भन्दिनु ।’

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्