उद्योगले 'मागेजति' बिजुली दिने प्राधिकरणको तयारी, चाहिएकाे मात्रा खुलाएर आवदेन दिन आग्रह

असोज १७, २०७८ आइतबार १३:५५:११ | रासस

काठमाण्डाै – माग गर्दा पनि बिजुली नपाएको भनेर लामो समयदेखि गुनासो गर्दै आएका उद्योगी तथा व्यवसायीलाई नेपाल विद्युत् प्राधिकरणले मागेजति विद्युत् उपलब्ध गराउने भएको छ ।

प्राधिकरणको प्रणालीमा झन्डै दुई हजार मेगावाट बिजुली उपलब्ध छ । तोकिएको लक्ष्यअनुसार काम भएको खण्डमा चालु आर्थिक वर्षमा नै थप एक हजार ३०० मेगावाट बढी बिजुली उपलब्ध हुन्छ । त्यसो हुँदा प्रणालीमा तीन हजार ३०० मेगावाट बराबरको बिजुली प्रवाह हुन्छ ।

प्राधिकरणका कार्यकारी निर्देशक कुलमान घिसिङका अनुसार अहिले रातको समयमा झन्डै ४०० मेगावाट बिजुली जगेडामा रहेको छ । यसो भन्नुको अर्थ खेर गइरहेको छ । यस्तै दिनको समयमा पनि झन्डै २५० मेगावाटसम्म बिजुली जगेडामा रहेको छ । प्राधिकरणले बढी भएको बिजुली भारत निकासीको प्रयास पनि नगरेको होइन । तर, नेपालमा आउन दिने, भारतमा निकासी हुन नसकेको अवस्थामा प्राधिकरणले देशभित्रै बिजुलीको खपत बढाउन लागेको हो ।

जानकारका अनुसार एक युनिट बिजुली लगानी गर्दा झन्डै ९० देखि १०० रुपैयाँ बराबरको आर्थिक उपार्जन हुन जान्छ । यस आधारमा बिजुलीलाई कच्चा पदार्थको रूपमा समेत लिइन्छ । उद्योगी व्यवसायीका अनुसार बिजुलीको सहज उपलब्धताले अर्थतन्त्रमा बहुआयामिक प्रभाव पर्दछ । प्राधिकरणले अब १३२ केभी क्षमताका प्रसारण लाइनमार्फत उद्योगी तथा व्यवसायीले मागेअनुसारको बिजुली उपलब्ध गराउने भएको छ । त्यसका लागि के–कति मात्रामा बिजुली चाहिएको हो भनेर आवेदन दिनसमेत भनिएको छ ।

वर्षाको समयमा नेपाल बिजुलीमा आत्मनिर्भर भइसकेको छ । आउँदाे डेढ वर्षभित्र हिउँदमा समेत आत्मनिर्भर हुने अवस्थामा पुगेको छ । प्राधिकरणले अहिले वर्षाको समयमा देशमा विद्युतकाे मागभन्दा उत्पादन बढी भइ खेर जाने अवस्था सिर्जना भएको भन्दै उद्योगीलाई थप बिजुली उपलब्ध गराउन सकिने उल्लेख गरेको छ । प्राधिकरणले २२० केभी र ४०० केभी क्षमताका प्रसारण लाइन निर्माण गरिरहेकाले १३२ केभीलाई पनि वितरण लाइनमा विस्तार गर्न चाहेको हो । यही असोज १४ गते विद्युत् विकास विभागले आयोजना गरेको विद्युत् महसुलसम्बन्धी सार्वजनिक सुनुवाइका क्रममा समेत कार्यकारी निर्देशक घिसिङले अब १३२ केभी क्षमताका प्रसारण लाइनमार्फत उद्योगीलाई गुणस्तरीय बिजुली उपलब्ध गराइने जानकारी दिनुभएको थियो ।

बिजुलीको सहज उपलब्धता बढ्दै गइ आत्मनिर्भर बनेको अवस्थालाई ध्यानमा राखेर देशभित्रै बिजुलीको खपत बढाउन कार्ययोजनाका साथ अगाडि बढेको कार्यकारी निर्देशक घिसिङको भनाइ छ । त्यस्तै देशका विभिन्न औद्योगिक सहरमा मागअनुसारको थप बिजुली उपलब्ध गराउन प्रसारण तथा वितरण लाइन तथा सबस्टेशनको विस्तारलाई व्यापक रूपले अगाडि बढाइएको छ । सबै प्रकारका ग्राहकलाई क्षमता वृद्धि वा थप बिजुली माग भएमा सरल र सहज हिसाबले शीघ्र उपलब्ध गराउने गरी व्यवस्था मिलाइएको छ ।

आयोगको सुनुवाइका क्रममा व्यवसायी एवम् एनएमबी बैंकका अध्यक्ष पवनकुमार गोल्यानले विदेश निर्यात गर्नुभन्दा देशभित्रै थप बिजुली उपलब्ध गराउन प्राधिकरणलाई आग्रह गर्नुभएको थियो । उहाँले प्राधिकरणले थप बिजुली उपलब्ध गराए आफूहरू लिन तयार रहेको बताउनुभएको थियो । त्यही आग्रहका आधारमा प्राधिकरणले ठूला औद्योगिक ग्राहकलाई थप बिजुली दिन लागेको हो । प्राधिकरणले १३२ केभी क्षमताको प्रसारण लाइनको आसपासमा विद्युत् माग गरेमा तत्काल उपलब्ध गराइने उल्लेख गरेको छ ।

सकेसम्म प्राधिकरणको प्रसारण तथा वितरण लाइन एवम् सबस्टेशन भएको ठाउँबाट नजिक उद्योग स्थापना गरी आवश्यक विद्युत् माग गर्न भनिएको छ । प्रसारण लाइन एवम् सबस्टेशनबाट टाढा भएमा कहिलेसम्ममा, के–कति मात्रामा बिजुली चाहिने हो यर्थाथ विवरण खुलाइ तत्काल माग गर्नसमेत प्राधिकरणले आग्रह गरेको छ । प्राविधिक दृष्टिकोणबाट सम्भव भएका ठाउँबाट तत्काल र प्राविधिक दृष्टिकोणबाट तत्काल सम्भव नभएका ठाउँमा प्राधिकरण थप लाइन तथा सबस्टेशन विस्तार गर्न पनि तयार रहेको जनाएको छ ।

त्यस्ता ठाउँमा छिटो भन्दा छिटो बिजुली आपूर्ति गर्ने प्राधिकरणले प्रतिबद्धता व्यक्त गरेको छ । उद्योगीका अनुसार थप ५०० देखि ८०० मेगावाटसम्मको थप बिजुली माग रहेको छ । त्यसमा सबैभन्दा बढी सिमेन्ट र छड उद्योगले थप माग गरेको अवस्था छ । प्रसारण लाइन निर्माण नभएका कारण चिनियाँ लगानीको होङ्शी सिमेन्ट उद्योगले बिजुली पाउन सकेको छैन । याे उद्योगले मात्रै ८० मेगावाट माग गरेको अवस्था छ ।

यस्तै, अन्य सिमेन्ट उद्योगले पनि क्षमता वृद्धिका लागि बिजुली माग गरेका छन् । बाह्य बजार खोज्दै हिँड्नु भन्दा देशभित्रै बिजुलीको बजार खोज्न प्राधिकरण लागिपरेको छ । कार्यकारी निर्देशक घिसिङले मागअनुसारको बिजुली उपलब्ध गराउनका लागि आफूहरू तयार रहेको जानकारी दिनुभएको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्