अध्यक्षमा निर्वाचित नभए पार्टीका कुनै कमिटीमा नबस्ने भीम रावलकाे घाेषणा

 मंसिर १४, २०७८ मंगलबार १३:३०:३ | उज्यालो सहकर्मी
unn.prixa.net

चितवन – नेकपा एमालेका निवर्तमान उपाध्यक्ष भीम रावलले आफू अध्यक्षमा निर्वाचित नभए पार्टीका कुनै कमिटीमा नबस्ने घोषणा गर्नुभएको छ । अध्यक्ष पदमा उम्मेदवारी दिनुभएका रावलले आफू त्यो पदमा विजयी नभए स्वतः पार्टी कमिटी बाहिर हुने प्रतिक्रिया दिनुभएको हो ।

आज मङ्गलवार चितवनको साैराहामा नेतृत्व चयनका लागि भएको मतदान सकिएलगत्तै उहाँले सञ्चारकर्मीले राखेका जिज्ञासाको जवाफ दिने क्रममा आफूले केन्द्रीय कमिटीको सदस्यका लागि उम्मेदवारी नदिएको दोहोर्‍याउँदै त्यसमा शपथ लिन नसक्ने पनि स्पष्ट पार्नुभयो ।

अध्यक्षका उम्मेदवार रावलले भन्नुभयो, ‘मैले केन्द्रीय सदस्यमा उम्मेदवारी दिएको छैन । अध्यक्ष पदमा विजय भए शपथ लिन्छु, अरूमा त मैले भरेकै छैन । अब प्रतिनिधिहरूले मत दिएनन् भने त कमिटी बाहिर बस्ने कुरा त सामान्य नै हो नि मेरा लागि । त्यो त केही छैन ।’

रावलले पार्टीको आठौँ महाधिवेशनमा पनि आफूले केन्द्रीय सदस्यमा उम्मेदवार नदिएकाले शपथ नलिएको पनि स्मरण गराउनुभयो । उहाँले महाधिवेशनको मत परिणाम दुई घण्टाभित्रै आउने आफूले अपेक्षा गरेको पनि बताउनुभयो । रावलले पार्टीकाे दशाैँ राष्ट्रिय महाधिवेशनमा निवर्तमान अध्यक्ष ओलीसँग अध्यक्ष पदमा उम्मेदवारी दिनुभएको हो । 

अन्तिम अपडेट: मंसिर २३, २०७८

1 Comments

  • Uday Saud

    Nov. 30, 2021, 7:44 p.m.

    पाएको बरिस्ठ उपाध्यक्ष वा उपाध्यक्ष पद त्यागी, हार्नेछु भन्दाभन्दै ओलि को जथ्था सग भिडन तयार राबलको बहादुरिलाइ सलाम छ🙏🙏

  •  0 Reply

तपाईको प्रतिक्रिया