काठमाण्डाै – नेपाली कांग्रेसका नेता एवम् गृहमन्त्री बालकृष्ण खाणले प्रधानमन्त्री शेरबहादुर देउवा पार्टीको सभापतिमा पहिलो चरणमै विजयी हुने बताउनुभएको छ ।

आज सोमवार भृकुटीमण्डपमा सञ्चारकर्मीसँगको कुराकानीमा नेता खाणले पार्टी सभापतिमा प्रधानमन्त्री देउवा पहिलो चरणको मतदानमै विजयी हुने बताउनुभएको हो । उहाँले आफ्नो उम्मेदवारी महामन्त्रीमा दिँदा पार्टी सभापतिलाई टिम समायोजन गर्न कठिन भएकाले केन्द्रीय सदस्यमै सीमित रहेको पनि बताउनुभयो ।

नेता खाणले पार्टीको एकता र सशक्तीकरणका लागि आफू सदैव एक कदम पछि हटेर सहयोग गरिरहेको भन्दै प्रधानमन्त्रीलाई साथ दिनु आफ्नो दायित्व भएको बताउनुभयो । उहाँले पार्टीको १५ औँ महाधिवेशन विद्युतीय मतदानबाट हुने पनि दाबी गर्नुभयो ।

नेता खाणले भन्नुभयो, ‘पुराना अनुहारहरूको पनि यो पार्टीमा धेरै योगदान छ । युवा पुस्ताहरू पनि आउनुभएको छ । त्यसैले पुराना र युवा पुस्तालाई संयोजन गरेर हामी अघि बढ्नेछौँ । १५ औँ महाधिवेशनमा नेपाली कांग्रेस विद्युतीय मतदानमा जान्छ । यस पटक सभापति पहिलो चरणमा नै पार गर्नुहुन्छ र विजयी हुनुहुन्छ, त्यही नै मतदाताहरूको रोजाइ देखियो । म एक कदम पछि हटेर पार्टीको वृहत्तर एकताका लागि काम गरेको छु । अहिले पनि पार्टी सभापति, प्रधानमन्त्रीलाई साथ दिनु मेरो दायित्व हो । टिम मिलाउन केही कठिनाइ देखिएपछि मैले केन्द्रीय सदस्यमा नै बसेको हुँ ।’