काठमाण्डाै - सहिद स्मारक ’बी’ डिभिजन लिग फुटबल अन्तर्गत आज सरस्वती युथ क्लब र झम्सिखेल युथ क्लबले बराबरी खेलेका छन् । एन्फा कप्लेक्स सातदोबाटोमा आज भएको खेलमा सरस्वती र झम्सिखेलले १–१ गोलको बराबरी खेलेका हुन्।

खेलको २२ औँ मिनेटमा सञ्जीव लामाले गोल गर्दै सरस्वतीलाई सुरुआती अग्रता दिलाएका थिए । तर, खेलको पहिलो हाफको इन्जुरी समयमा तीर्थ बहादुर बस्नेतले गोल गर्दै झम्सिखेललाई १–१ गोलको बराबरीमा ल्याए ।

एन्फा कम्पलेक्समै आजै  भएको अर्को खेलमा  मध्यपुर युथ एसोसिएशनले विजयी सुरुआत गरेको छ । मध्यपुरले सामाजिक युवा क्लबलाई ५–२ गोल अन्तरले पराजित गरेको हो ।

मध्यपुरका लागि सञ्जीव थापा मगरले दुई गोल गर्दा सन्नी लामा, धिरज श्रेष्ठ र जेनिष प्रजापतिले एक–एक गोल गरे ।  सामाजिक युवाका लागि विकास दर्जी र वसन्त बहादुर रानाले एक–एक गोल गरे ।