धुलाबारी–भद्रपुर सडक : ३ वर्षमा एक किलोमिटर मात्र कालोपत्र

चैत २८, २०७८ सोमबार १४:११:१८ | रासस

झापा – धुलाबारी भद्रपुर जोड्ने सडक बनाउने काम बजेट अभावमा एक किलोमिटर मात्र कालोपत्र भएको छ ।

आर्थिक वर्ष २०७९ असार मसान्तसम्म निर्माण सम्पन्न गर्ने गरी निर्माण कम्पनीसँग ठेक्का सम्झौता भए पनि बजेट अभावमा अहिले मेचीनगर नगरपालिका १० को खयरडाँगीको भेटवाल चोकबाट मेचीनगर १५ को शिवालय मन्दिर छेउसम्मको सडक मात्र कालोपत्र भएको हो ।

भद्रपुर धुलाबारी खण्डको लागत मूल्य अभिवृद्धि करसहित प्रदेश नं १ को सरकारको २५ करोड ३२ लाख ८४ हजार रुपैयाँमा हिम्डुङ एन्ड थोकर सरोज जेभीलाई ठेक्कामा दिइएको थियो । निर्माण कम्पनीले सम्झौताको तीन वर्षको अवधिमा एक किलोमिटर सडक मात्र कालोपत्र गर्न सकेको पूर्वाधार विकास कार्यालय झापाका प्रमुख रमेशकुमार श्रेष्ठले बताउनुभयो ।

उहाँले बजेट अभावमा जति काम हुनुपर्ने हो त्यति हुन नसकेको बताउनुभयो । ‘प्रदेश सरकारले समयमा बजेट नपठाउँदा काममा ढिलाइ भइरहेको छ’, उहाँले भन्नुभयो, ‘आउँदो वैशाखको पहिलो हप्ताभित्रमा बजेट आयो भने काम सकिन्छ, त्योभन्दा ढिलो भएमा म्याद थपेर अर्को वर्ष बनाउनुको विकल्प छैन ।’

उहाँका अनुसार मेचीनगर नगरपालिकाको १० नम्बर वडाको भेटवाल चोकदेखि मेचीनगर १५ कै ज्यामिरगढीमा रहेको हडिया खोलासम्मको नौ किलोमिटर सडक कालोपत्र गर्ने योजनामा परेको थियो । योजनाअनुसार नै सडकको दुवै साइडमा नाली खन्ने र सडक कालोपत्र गर्न योग्य बनिसकेको उहाँको ठहर छ ।

विसं २०७६ कात्तिक २० गते निर्माण कम्पनीसँग २०७९ साल असार ३१ गते निर्माण सम्पन्न गर्ने सम्झौता भएर त्यो सडकको शिलान्यास तत्कालीन आर्थिक मामिला तथा योजनामन्त्री इन्द्रकुमार आङ्बोले गर्नुभएको थियो । उहाँले जिल्लाका अन्य क्षेत्रमा समेत प्रदेश सरकारको लगानीमा निर्माण भइरहेका सडक बजेट अभावमा अलपत्र अवस्थमा रहेको जानकारी दिनुभयो ।

धुलाबारी–भद्रपुर जोड्ने यो सडक खण्डमा नेपाल प्रवेश गरेका पर्यटक यही बाटो हुँदै चन्द्रगढी एअरपोर्टबाट काठमाण्डौलगायत देशका अन्य भागमा जान सजिलो हुने हुँदा चाँडै निर्माण सक्नुपर्ने नगरपालिकाकी उपमेयर मीना उप्रेतीको भनाइ छ ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

धुलाबारी–भद्रपुर सडक : ३ वर्षमा एक किलोमिटर मात्र कालोपत्र

फाइल फाेटाे

तपाईको प्रतिक्रिया