काठमाण्डाै - इङ्ग्लिस क्लब म्यानचेस्टर सिटी र लिभरपुल च्याम्पियन्स लिग फुटबलको सेमिफाइनलमा प्रवेश गरेका छन् ।

गएराति भएको क्वाटरफाइनलको दोस्रो लेगमा एट्लेटिको मड्रिडसँग गोलरहित बराबरी खेल्दै सिटी समग्रमा १–० को जितसहित अन्तिम चारमा पुगेको हो ।

घरेलु मैदानमा भएको पहिलो लेगमा सिटीले १–० को जित निकालेको थियो । अब सिटीले सेमिफाइनलमा रियल मड्रिडसँग खेल्नेछ ।

अर्को खेलमा लिभरपुलले पनि पोर्चुगिज क्लब बेन्फिकासँग ३–३ गोलको बराबरी खेलेको छ । क्वाटरफाइनलको दोस्रो लेगमा बराबरी खेलेको लिभरपुल समग्रमा ६–४ को जितसहित अन्तिम चारमा पुगेको हो ।

पहिलो लेगमा लिभरपुलले ३–१ को जित निकालेको थियो । दोस्रो लेगमा लिभरपुलका रोबर्टो फिर्मिन्होले दुई गोल गरे । त्यस्तै इब्राहिम कोनाटेले एक गोल गरे । बेन्फिकाका गोन्कालो रामोस, रोमन यारेमचुक र डार्विन नुनेजले गोल गरे । अब लिभरपुलले सेमिफाइनलमा स्पेनिस क्लब भिल्ला रियलसँग खेल्नेछ ।