ललितपुर – नेपाल टेलिकमले सदर चिडियाखाना जावलाखेलमा रहेका जनावर र पक्षीका लागि एक वर्षसम्म आहाराको प्रायोजन गरेको छ ।

टेलिकमले कम्पनीको संस्थागत सामाजिक उत्तरदायित्वअन्तर्गत चिडियाखानाका जनावर र पक्षीका लागि एक वर्षसम्म आहाराको प्रायोजन गर्ने भएको हो । यससम्बन्धी सम्झौतापत्रमा आज आइतवार नेपाल टेलिकमको तर्फबाट प्रमुख व्यावसायिक अधिकृत संगीता पहाडी र सदर चिडियाखाना जावलाखेलका तर्फबाट निर्देशक रचना शाहले हस्ताक्षर गर्नुभएको छ ।

सम्झौता कार्यक्रममा प्रमुख व्यावसायिक अधिकृत पहाडीले नेपाल टेलिकम र सदर चिडियाखानाबीच आउँदा दिनमा समेत आपसी हित अभिवृद्धि हुने गरी विभिन्न कार्यक्रम गर्न सकिने र यो एउटा सुरुवात भएको बताउनुभयो ।  

यस्तै राष्ट्रिय प्रकृति संरक्षण कोषका सदस्य सचिव शरद अधिकारीले धेरै पर्यटकको उपस्थिति हुने सदर चिडियाखानामा नेपाल टेलिकमसँगको सम्झौताले दुवै पक्षलाई फाइदा पुग्ने बताउनुभयाे ।कम्पनीको संस्थागत सामाजिक उत्तरदायित्वअन्तर्गत कम्पनीबाट प्राप्त यो सहयोगलाई राष्ट्रिय प्रकृति संरक्षण कोषले सदुपयोग गर्ने उहाँले विश्वास दिलाउनुभयो । 

सम्झौताअनुसार नेपाल टेलिकमले चिडियाखानामा रहेको एउटा बाघ र अन्य जनावर तथा पक्षीहरूका लागि एक वर्षसम्म आहाराको व्यवस्थाका लागि रकम उपलब्ध गराउने छ ।