काठमाण्डाै – नेपाली कांग्रेसका प्रवक्ता डा. प्रकाशशरण महतले नेकपा एमालेका अध्यक्ष केपी शर्मा ओलीले निर्वाचन आचारसंहिता उल्लङ्घन गरेको भन्दै निर्वाचन आयोगको ध्यानाकर्षण गराउनुभएको छ । 

आज मङ्गलवार पार्टी केन्द्रीय कार्यालयमा नेपाली कांग्रेस केन्द्रीय प्रचारप्रसार सांस्कृतिक समन्वय उपसमितिले आयोजना गरेको ‘कांग्रेस नै चाहियो’ नामक गीत विमोचन समारोहमा बोल्दै प्रवक्ता महतले एमाले अध्यक्ष ओलीले निर्वाचन आचारसंहिताको धज्जी उडाएको आरोप लगाउनुभएको हो । 

प्रवक्ता महतले भन्नुभयाे, ‘आचारसंहिताकाे धज्जी उडाएर, आफूखुसी अत्यन्त तल्लो स्तरबाट पूर्वप्रधानमन्त्रीकाे मुखबाट शब्दहरू आइरहेकाे छ । हाम्रो घोषणापत्रलाई लिएर, हाम्रो पार्टीलाई लिएर प्रयाेग गरिएकाे शब्द अत्यन्त खेदजनक छ । यसबारेमा हामी निर्वाचन आयोगले गम्भीर ध्यानाकर्षण गराउन चाहान्छौँ । आचारसंहिताकाे बेलामा मात्रै हाेइन अघिपछि पनि बोल्न नमिल्ने अभिव्यक्तिहरू आइराखेकाे छ तर केही पनि नभएको जस्तो रूपमा उहाँहरूले मात्रै जे पनि बोल्ने, जे पनि गर्ने छुट भए जसरी आएको छ । यसप्रति आयाेगकाे ध्यानाकर्षण गराउँछाैँ ।’

एमाले अध्यक्ष ओलीले आज नै पार्टीको एक कार्यक्रममा नेपाली कांग्रेसको घोषणापत्रलाई लिएर विभिन्न टिप्पणी गर्नुभएको थियो । प्रवक्ता महतले ओलीको त्यही टिप्पणीप्रति असन्तुष्टि जनाउनुभएको हो । 

उहाँले पालिका चुनावमा नेपाली कांग्रेसले गरेका राम्रा कामहरूको व्यापक प्रचारप्रसार गर्न पार्टीका नेता, कार्यकर्तालाई निर्देशनसमेत दिनुुभयो ।