काठमाण्डाै – राष्ट्रिय जनमोर्चाका अध्यक्ष चित्रबहादुर केसीले गठबन्धनलाई भोट नदिनु बेइमानी गर्नु भएको जिकिर गर्नुभएकाे छ । 

आज शुक्रवार काठमाण्डाैमा आयोजित सत्ता गठबन्धनको चुनावी सभालाई सम्बोधन गर्दै अध्यक्ष केसीले गठबन्धनलाई भोट नदिएर तलमाथि गर्नुनहुने बताउनुभएको हो । गठबन्धनका उम्मेदवारलाई जनमोर्चाले इमानदारीपूर्वक सहयोग गर्ने उल्लेख गर्दै उहाँले आफ्ना उम्मेदवार भएको ठाउँमा पनि गठबन्धनका सबैले सहयोग गर्न आग्रह गर्नुभयो । 

अध्यक्ष केसीले जनमोर्चा सत्तारूढ गठबन्धनमा सहभागी भएकोमा कतिपयले विरोध गर्ने गरेको भन्दै आफूले विगतमा पनि गिरिजाबाबु, गणेशमान लगायतसँग सहकार्य गरेको बताउनुभयो । उहाँले आफ्नो पार्टी प्रतिनिधि सभा विघटन भएदेखि नै गठबन्धनको पक्षमा रहेको स्पष्ट पार्नुभयो । 

उहाँले भन्नुभयो, ‘गठबन्धन भनेको मिलेको कुरामा मात्रै मिलेर जाने हो नि । यहाँ अरू भएका बाँकी साथीहरूले एमसीसी पास गर्नुभयो तर राष्ट्रिय जनमोर्चाले मान्दै मानेन । नमान्ने अधिकार छ नि हामीसँग । त्यसपछि एमसीसीमा सामेल नहुने फेरि पाँच दलीय गठबन्धनभित्र राष्ट्रिय जनमोर्चा गयो, बिक्यो, सक्कियो पनि भने । चित्रबहादुरको टाउकाेमा रुख चिह्न राखेर समेत यहाँ प्रचार गरिराखेका छन् । ती प्रतिगामीका मतियार हुन् । देशभरि गठबन्धनका उम्मेदवार साथीहरू जहाँ हुनुहुन्छ, राष्ट्रिय जनमोर्चाले इमानदारीपूर्वक सहयोग गर्छ । त्यसमा तलमाथि हुन सक्दैन । तलमाथि गर्नु भनेको बेइमानी हो । यस्तो दिन भोलि आउन्न र ?’

अध्यक्ष केसीले वर्तमान सत्तारूढ गठबन्धनभन्दा प्रतिगमन बलियो भएकाेले सजग रहनुपर्ने बताउनुभयो ।