चार वटा पालिकामा विपद् व्यवस्थापन कोषबाट रकम निकासा गर्न स्वीकृति

 भदौ १९, २०७९ आइतबार ८:३६:२० | उज्यालो सहकर्मी
unn.prixa.net

काठमाण्डाै - सरकारले चार वटा पालिकामा बाढी/पहिरोलगायत विपद् आपत्कालीन संरक्षण कार्य गर्न विपद् व्यवस्थापन कोषबाट रकम निकासाका लागि स्वीकृति दिएको छ ।

विपद् जोखिम न्यूनीकरण तथा व्यवस्थापन कार्यकारी समितिको १५औँ बैठकले यसै वर्ष र गएको वर्षमा बाढी/पहिरोले ठूलो क्षति गरेका चारवटा पालिकामा आपत्कालीन संरक्षण कार्य गर्न विपद् व्यवस्थापन कोषबाट रकम निकासा गर्न स्वीकृति दिएको हो ।

बैठकले उदयपुरको बेलका नगरपालिका, प्युठानको प्युठान नगरपालिका, गोरखाको पालुङटार नगरपालिका र डडेलधुराको गन्यापधुरा नगरपालिकालाई ३ करोड १४ लाख ६८ हजार रुपैयाँ उपलब्ध गराउन अनुमति दिएको हो ।

साथै उदयपुर, सप्तरी र सुनसरीका बाढी प्रभावित १६ वटा वडालाई विपद् सङ्कटग्रस्त क्षेत्र घोषणा समेत गरिएको छ । सप्तकोसी नदीमा गएको साउन १७ गते आएको बाढीबाट प्रभावित तीन जिल्लाका १६ वटा वडालाई विपद् सङ्कटग्रस्त क्षेत्र घोषणा गरिएको हो ।

तीन जिल्लाका ४ वटा नगरपालिकाका १६ वटा वडालाई आउँदो पुस मसान्तसम्मका लागि विपद् सङ्कटग्रस्त क्षेत्र घोषणा गरिएको छ । उदयपुरको बेलका नगरपालिकाका १, २, ३, ८ र ९ वडा, सुनसरीको बराहक्षेत्र नगरपालिका वडा नम्बर ६ र ९ तथा सप्तरीको सप्तकोसी नगरपालिका वडा नम्बर ६, ७ र ९ तथा कञ्चनरुप नगरपालिकाका १, २, ४, ५, ६ र १० नम्बर वडालाई विपद् सङ्कटग्रस्त क्षेत्र घोषणा गरिएको गृह मन्त्रालयले जनाएको छ ।

उदयपुर र सप्तरी सीमा क्षेत्र नजिकैको डुम्रिबोटबाट सप्तकोसी नदीको पश्चिमतर्फको तटबन्ध भत्काएर बाढी मानव बस्तीमा पसेको थियो । बाढीबाट सयौँ घर डुबानमा परेका थिए।

अन्तिम अपडेट: मंसिर ६, २०७९

तपाईको प्रतिक्रिया