काठमाण्डाै – आज साेमवार बिहान ट्राफिक प्रहरीले गरेको जाँचका क्रममा जाँड–रक्सी खाएर मोटरसाइकल चलाउने एक जनासहित ५१ जना विद्यार्थी कारबाहीमा परेका छन् ।

स्कुल, कलेजका विद्यार्थी सुरक्षा लक्षित जाँचका क्रममा 'प्लस टु' पढ्दै गरेका २१ वर्षका एक जना विद्यार्थीले जाँड–रक्सी खाएर मोटरसाइकल चलाएको पाइएकोले कारबाही गरेको काठमाण्डौ उपत्यका ट्राफिक प्रहरी कार्यालयका प्रवक्ता एवम् प्रहरी वरिष्ठ उपरीक्षक (एसएसपी) राजेन्द्रप्रसाद भट्टले जानकारी दिनुभयो ।

यस्तै चालक अनुमति पत्र प्राप्त नगरि मोटरसाइकल चलाउने २८ जना, कागजपत्र साथमा नभएका २१ जना र मोटरसाइकलमा तीन जना सवार एक जना चालक कारबाहीमा परेका छन् ।

गएकाे साउन ३० गतेदेखि सुरु भएको स्कुल, कलेजका विद्यार्थी सुरक्षा लक्षित जाँच अभियानमा अहिलेसम्म एक हजार ८२ जना विद्यार्थी चालकलाई ट्राफिक प्रहरीले विभिन्न कसुरमा कारबाही गरिसकेको छ ।