काठमाण्डाै - च्याम्पियन्स लिग फुटबलमा बार्सिलोनाले चेक क्लब भिक्टोरिया प्लेजनलाई हराएको छ । गएराति भएको खेलमा रोबर्ट लेवान्डोस्कीको ह्याट्रिकमा बार्सिलोनाले प्लजेनलाई ५–१ गोलको अन्तरले हराएको हो ।

फ्रेन्की किसी र फेरान टोरेसले एक/एक गोल गरे । पाहुना टोलीका जान सिकोराले एक गोल फर्काए । समूह ‘सी’ मा बार्सिलोनाले सुखद सुरुवात गरेको छ । अर्को खेलमा टोटनह्यामले फ्रान्सेली क्लब मार्सेलीलाई २–० ले हराएको छ ।

टोटनह्यामका रिचर्डलिसनले अन्तिम समयमा दुई गोल गरे । समूह ‘डी’ मा टोटनह्यामले तीन अङ्क जोडेको छ । यो समूहको अर्को खेलमा पोर्चुगिज क्लब स्पोर्टिङले जर्मन क्लब फ्रेन्कफर्टलाई ३–० ले हराएको छ । च्याम्पियन्स लिग फुटबलको अर्को खेलमा इटालियन क्लब नापोलीसँग लिभरपुलले लज्जास्पद हार ब्यहोरेको छ ।

गएराति भएको समूह चरणको पहिलो खेलमा नापोलीले प्रिमियर लिग क्लब लिभरपुललाई ४–१ गोलले हराएको हो । नापोलीको जितमा जिलिस्की पेनले दुई, जाम्बो एन्गुइसा र जियोवानी शिमोनले एक/एक गोल गरे । लिभरपुलका लुइज डियाजले एक गोल फर्काए । समूह ‘ए’ को पहिलो खेलमा लिभरपुलले खराब प्रदर्शन गरेको हो । नापोलीले तीन अङ्क जोडेको छ । त्यही समूहको अर्को खेलमा डच क्लब आजाक्सले रेन्जर्सलाई हराएर तीन अङ्क जोडेको छ । 

च्याम्पियन्स लिग फुटबलको समूह चरणको पहिलो खेलमा जर्मन क्लब बायर्न म्युनिखले इटालियन क्लब इन्टर मिलानलाई हराएको छ । बायर्नले घरेलु टोली इन्टर मिलानलाई २–० गोलले पराजित गरेको हो । बायर्नको जितमा लिरोए सानेले एक गोल गर्दा एक गोल उपहार पाएको थियो । खेलको ६६औँ मिनेटमा डानिलो डी एम्ब्रुसोले आत्मघाती गोल गरे । 

अर्को खेलमा स्पेनिस क्लब एट्लेटिको मड्रिडले रोमाञ्चक जित निकालेको छ । घरेलु मैदानमा एट्लेटिकोले १० खेलाडीमा समेटिएको पोर्चुगिज क्लब एफसी पोर्टोलाई २–१ ले पराजित गरेको हो । एट्लेटिकोको जितमा मारियो हर्मोसो र एन्टोइन ग्रिजमनले गोल गरे । पोर्टोका मेटेअस युरिवेले एक गोल फर्काए ।