राष्ट्रपतिको कदमप्रति संयुक्त विद्यार्थी सङ्गठनद्वारा विराेधका कार्यक्रम घाेषणा

 असोज ५, २०७९ बुधबार १८:४२:१८ | उज्यालो सहकर्मी
unn.prixa.net

फाइल फाेटाे

काठमाण्डाै – राष्ट्रपति विद्यादेवी भण्डारीले नागरिकता विधेयक प्रमाणीकरण नगरेको भन्दै सत्तारूढ गठबन्धनका विद्यार्थी सङ्गठनहरूले विरोधका कार्यक्रम घोषणा गरेका छन् । 

बुधवार काठमाण्डाैमा पत्रकार सम्मेलन गर्दै नेपाली कांग्रेस निकट नेपाल विद्यार्थी सङ्घ, नेकपा (माओवादी केन्द्र) निकट अनेरास्ववियु (क्रान्तिकारी), नेकपा (एकीकृत समाजवादी) निकट अनेरास्ववियु, जनता समाजवादी पार्टी नेपाल निकट समाजवादी विद्यार्थी युनियन र नेपाल समाजवादी पार्टी निकट समाजवादी विद्यार्थी युनियनले संयुक्तरूपमा विरोधको कार्यक्रम घोषणा गरेका हुन् । 

विरोधको कार्यक्रमहरूमा असोज ६ गते देशभरका जिल्लामा संयुक्त विरोध प्रदर्शन गर्ने, ६ गते नै माइतीघर मण्डलामा बिहान ९ बजे कार्टुन प्रदर्शनी तथा संयुक्त विरोध प्रदर्शन गर्ने र असोज ७ गते बिहान ११ बजे सडक बहस कार्यक्रम गरिने जनाइएको छ ।

विद्यार्थी सङ्गठनहरूले राष्ट्रपतिले कुनै दलको स्वार्थ र इसारामा नागरिकता विधेयकलाई प्रमाणीकरण नगरि विफल तुल्याएको आरोप लगाएका छन् । त्यस्तै राष्ट्रपतिको कदमलाई असंवैधानिक कदमको संज्ञा दिँदै राष्ट्र, राष्ट्रियता, नेपाली नागरिक र व्यवस्थामाथि प्रहार गरिएको उल्लेख गरेका छन् ।

पत्रकार सम्मेलनमा विद्यार्थी नेताहरूले राष्ट्रपति विद्यादेवी भण्डारीको राजीनामा माग पनि गरेका छन् । 

अन्तिम अपडेट: असोज ८, २०७९

तपाईको प्रतिक्रिया