कास्की – नेपाल पुलिस क्लबको महिला क्रिकेट टोलीले नवौँ राष्ट्रिय खेलकुद प्रतियोगिताको डेब्यु खेलमा नै स्वर्ण पदक जितेको छ । 

पोखरा रङ्गशालामा आज मङ्गलवार भएको फाइनल खेलमा पुलिसले सशस्त्र प्रहरी बल (एपीएफ) लाई पाँच रनले हराउँदै स्वर्ण जितेको हो । पहिलो पटक महिला टोली बनाएको पुलिसले डेब्यु प्रतियोगितामै ऐतिहासिक स्वर्ण पदक जित्न सफल भयो । 

जितका लागि पुलिसले दिएको ९० रनको लक्ष्य पछ्याएको एपीएफले निर्धारित २० ओभरमा सात विकेट गुमाएर ८४ रनमात्र बनाउन सक्याे । एपीएफका लागि रोमा थापाले २६ र राजमती ऐरीले नटआउट १२ रन बनाइन् । बलिङतर्फ पुलिसकी ईश्वरी विष्टले २ तथा हिरन्माई रोय, सङ्गीता राई र कप्तान रुबिना क्षेत्रीले एक/एक विकेट लिए । 

यसअघि टस जितेर पहिले ब्याटिङ गरेको पुलिसले निर्धारित २० ओभरमा चार विकेट गुमाएर ८९ रन बनाएको थियो । पुलिसका लागि काजल श्रेष्ठले २७ र सम्झना खड्काले २१ रन बनाइन् । बलिङतर्फ एपीएफकी नेरी थापा, ईन्दु बर्मा र कप्तान सीता राना मगरले एक/एक विकेट लिए । 

याे हारसँगै एपीएफले रजत पदकमा चित्त बुझाएको छ । आजै भएको अर्को खेलमा बाग्मती प्रदेशले लुम्बिनी प्रदेशलाई सात विकेटले हराउँदै कास्य पदक जितेको थियो ।

यही प्रतियोगिताको पुरुषतर्फको खेलमा पनि नेपाल पुलिस क्लबले नै स्वर्ण पदक जितेको थियो ।