महिला भलिबलमा एपीएफलाई स्वर्ण

कात्तिक २, २०७९ बुधबार १९:३३:५९ | प्रताप बानियाँ

म्याग्दी – नवौँ राष्ट्रिय खेलकुद प्रतियोगिताअन्तर्गत महिला भलिबलमा विभागीय टोली सशस्त्रको एपीएफ क्लबले स्वर्ण पदक जितेको छ । म्याग्दीको बेनीमा आज (बुधवार) सम्पन्न फाइनल खेलमा अर्को विभागीय टोली नेपाल पुलिस क्लबलाई ३–१ को सेटमा पराजित गर्दै एपीएफले स्वर्ण जितेको हो ।

एपीएफ क्लबले पहिलो सेट २५–१९ ले जित्दै अग्रता बनाएको थियो भने प्रतिस्पर्धात्मकरूपमा दोस्रो सेट पनि ३०–२८ ले जितेको थियो । तेस्रो सेटमा भने पुलिस क्लबले पुनरागमन गर्दै ट्राइब्रेकमा २६–२४ ले आफ्नो पक्षमा पारेको थियो । तर चौथो तथा अन्तिम सेट भने एपीएफले २५–१९ ले आफ्नो पक्षमा पार्दै स्वर्ण जित्याे ।

यसैगरी आजै बिहान भएको भलिबलमा बाग्मती प्रदेशले गण्डकीलाई हराउँदै कास्य जितेको छ । बाग्मतीले गण्डकीलाई ३–१ को सेटमा पराजित गरी कास्य पदक जितेको जिल्ला भलिबल सङ्घ म्याग्दीका अध्यक्ष तेजेन्द्र बानियाँले जानकारी दिनुभयो । यो खेलमा पहिलो सेट गण्डकीले २५–२० ले बाग्मतीलाई जितेको थियो भने त्यसपछि लगातार तीन सेट बाग्मतीले २५–१२, २५–२१ र २५–१७ ले जितेको थियो ।

महिला भलिबलको फाइनल खेलसँगै म्याग्दीमा खेलाइएको भलिबल र तेक्वान्दो प्रतियोगिता सकिएको आयोजकले जनाएको छ । प्रतियोगितामा विजयी बनेका क्लब तथा खेलाडीलाई नगद, ट्रफी, मेडल र प्रमाणपत्रले पुरस्कृत गरिएको छ । गएको असोज २७ गतेदेखि म्याग्दीको सदरमुकाम बेनी बजारमा रहेकाे खुलामञ्चमा महिला भलिबल र कालीपुलको बहुउद्देश्यीय कभर्ड हलमा तेक्वान्दो प्रतियोगिता सुरु भएको थियो ।

राष्ट्रिय महिला भलिबल प्रतियोगितामा सात वटा प्रदेश र विभागीय टिम गरेर १० वटा टिमले सहभागिता जनाएका थिए भने तेक्वान्दो प्रतियोगितामा सात प्रदेश, विभागीय र एनआरएनएसहित ११ वटा टिमको सहभागिता थियो । दुवै खेलका लागि खेलाडी तथा अफिसियलसहित ६ सय जनाभन्दा बढी म्याग्दी आएका थिए ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्