काठमाण्डौ – तिहार लागेसँगै काठमाण्डौ लगायत देशभरका बजारमा सामान किन्नेको भिड बढेको छ ।

तिहार लागेसँगै काठमाण्डौ उपत्यकाका मुख्य व्यापारिक क्षेत्रहरुमा सामान किन्नेहरुको भिड देखिएको हो । काठमाण्डौको असन, इन्द्रचोक, नयाँ सडक, भोटाहिटी लगायतका क्षेत्रमा मानिसको उल्लेख्य भिड छ ।

काठमाण्डौका भित्री गल्लीमा समेत खाने मसलाका आकर्षक प्याकेटहरु सजाइएको छ । मखमली र सयपत्री फूलले काठमाण्डौका बजार ढाकिएका छन् । बजार घुम्न जानेलाईसमेत तिहारको रमझमले आकर्षित बनाएको छ ।

तिहारमा प्रयोग हुने सामानहरुमध्ये झिलीमिली बत्ती, तामा र पित्तलका भाँडा, दियो, प्लास्टिकका मालाहरु, सप्तरंगी टीकालगायतका सामग्रीहरु यतिबेला बजारमा जहाँतहीँ बेच्न राखिएका छन् ।

विशेष गरी तिहारमा चाहिने सामान किनमेल गर्न मानिसहरु असन, भोटाहिटी, इन्द्रचोक, न्युरोडलगायतका ठाउँमा आउने भएकाले पनि त्यस क्षेत्रमा बढी भिड भएको हो ।

लक्ष्मी पूजाका लागि चाहिने माटाको पाला, बत्ती, सप्तरंगी टीका, कपडा, ढाकाटोपी र अन्य सामग्रीहरु किनमेल गर्नेको चहलपहल बजारमा जताततै देख्न सकिन्छ ।

त्यस्तै भाइटीकाका लागि चाहिने सगुनहरुको पनि किनमेल बढेको छ । यी क्षेत्र लगायत उपत्यकाका अन्य क्षेत्र र देशभरका बजारहरुमा पनि तिहारमा चाहिने सामान किन्नेहरुको चहलपहल सुरु भएको पाइन्छ ।

आजदेखि विधिवत रुपमा यमपञ्चक सुरु भएको छ । आज धनतेरस पर्व पनि मनाइँदै छ । सुन, चाँदीका सामग्रीहरुको पूजा गरेर धनतेरस मनाइने गरिन्छ ।