पाल्पा – रामपुरमा रहेको तालपोखरा यति बेला पाल्पा घुम्न जाने पर्यटकको प्रमुख आकर्षक गन्तव्य बनेको छ । 

बिदाको अवसरमा घुम्न जानेदेखि बाहिरी जिल्लाबाट शैक्षिक अवलोकन भ्रमणमा पुग्ने जोकोहीको रोजाइमा परेसँगै तालपोखरामा पुग्ने पर्यटकको सङ्ख्यासमेत बढ्न थालेको छ । फेवातालको भल्को मेटाउने तालपोखरा दुई दशक अगाडिसम्म सानो पोखरीमा सीमित थियो । तालपोखराको क्षेत्र विस्तार गरी कास्कीको फेवातालको स्वरूप र शैलीमा पूर्वाधार निर्माण गरिएसँगै अहिले यहाँ आउने पर्यटकको सङ्ख्या बढेको हो । 

तालपोखरालाई लुम्बिनी प्रदेश सरकारले एक सय पर्यटकीय गन्तव्यस्थलका रूपमा घोषणा गरेपछि यहाँ पर्यटकको चहलपहल अझ बढेको स्थानीयवासीको भनाइ छ । राष्ट्रिय गौरवको आयोजना कालीगण्डकी कोरिडोरले समेत दाहिने परेकोे यस तालमा पाल्पासहित रूपन्देही, स्याङ्जा, तनहुँ, पूर्वी नवलपरासीलगायतका छिमेकी जिल्लाबाट अवलोकनका लागि पर्यटक पुग्ने गरेका बताउनुहुन्छ आन्तरिक पर्यटक सागर भुसाल । तालपोखराको अझै प्रचार हुन सके धेरै पर्यटक आउने उहाँले बताउनुभयो ।   

यस तालको पर्यटन प्रवद्र्धनका लागि पालिकाले डुङ्गा दौड प्रतियोगिता सञ्चालन गर्दै आएको छ । गएको तीन वर्ष कोभिड–१९ का कारण थला परेको पर्यटन व्यवसाय सर्वसाधारणलाई खुला गरिएपछि आन्तरिक पर्यटकको मुख्य रोजाइमा तालपोखरा परेको व्यवस्थापन समितिका सचिव सुनिल देवकोटा बताउनुहुन्छ ।  

तीन तहकै सरकार र पर्यटन बोर्डले हातेमालो गरेर अगाडि बढेको खण्डमा विदेशी पर्यटकको अध्ययन र अवलोकनको मुख्य गन्तव्य तालपोखरा बन्ने सचिव सापकोटाको भनाइ छ ।