रौतहटमा आगलागीमा परेर एकै घरका ३ बालबालिकाको ज्यान गएको पुष्टि, ३ जना घाइते

मंसिर ८, २०७९ बिहीबार ८:४३:१९ | उज्यालो सहकर्मी

रौतहट - रौतहट सदरमुकाम गौरमा गएराति भएको आगलागीमा परेर एकै घरका ३ बालबालिकाको ज्यान गएको छ । गौर नगरपालिका १ माईस्थान चोकमा रहेको इस्लाम कपडा–डसना पसलमा गए राति ११ बजे आगलागी हुँदा तीन बालबालिकाको घटनास्थलमै जलेर ज्यान गएको छ भने तीन जना घाइते भएका छन् ।

आगलागीमा इस्लाम मियाकी ९ वर्षकी छोरी रुक्साना खातुन, ५ वर्षकी छोरी सविना खातुन र ७ वर्षको छोरा इमरान मन्सुरीको ज्यान गएको प्रहरीले जनाएको छ । यसैगरी घाइते हुनेमा इस्लामका २६ वर्षका भतिजा महम्मद इसराइल मन्सुरी, ८ वर्षका महम्मद इमरान र २४ वर्षकी नसिमा खातुन छन् ।

घरमा आगो लागेपछि भागेर ज्यान जोगाउने क्रममा खातुन लडेर घाइते भएका प्रहरीले जनाएको छ । घाइते तीन जनाकै उपचार गौर अस्पतालमा भइरहेको छ । एक जनाको अवस्था गम्भीर भएकाले काठमाण्डौ ल्याउने तयारी छ । ज्यान गुमाएका तीन जनाको शव गौर अस्पतालमा राखिएको छ । आगलागी हुँदा घरमा १६ जना सुतिरहेका थिए । सुतेकै अवस्थामा आगलागी भएको हुँदा मानवीय समेत क्षति हुन पुगेको प्रहरीको भनाई छ ।

आगालागीले कपडा–डसना पसलसँगै रहेको मोटरसाइकल ग्यारेजमा पनि क्षति पुर्याएको छ । ग्यारेजमा बनाउनलाई राखिएका दर्जनौँ मोटरसाइकल जलेका छन् । मोटरसाइकल बनाउने ग्यारेजमा रहेका मोटरसाइकलको पेट्रोल तथा ग्यालेनमा रहेको पेट्रोलमा आगो सल्केपछि आगो झनै बढेको थियो ।

नेपाल प्रहरी, सशस्त्र प्रहरी, नेपाली सेना तथा स्थानीयवासीको सहयोगमा राति नै आगो निभाइएको जिल्ला प्रहरी कार्यालय रौतहटका प्रमुख एसपी वीरबहादुर बुढा मगरले जानकारी दिनुभयो । गौर नगरपालिकाका नगर मेयर शम्भु साहले घटना निकै दुःखद भएको भन्दै पीडितलाई सहयोग गर्न नगरपालिका तयार रहेको बताउनुभयो ।

यस्तै, एकीकृत समाजवादी पार्टीका अध्यक्ष माधव नेपालले पनि पीडित परिवारलाई भेट्नु भएको छ ।

अन्तिम अपडेट: माघ ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्