‘श्रम स्वीकृति बन्द भएको छैन, तर सकेसम्म कोरोना प्रभावित देशमा नजानुहोस्’

फागुन २३, २०७६ शुक्रबार १४:४२:३७ | उज्यालो सहकर्मी

काठमाण्डौ – वैदेशिक रोजगार विभागले श्रम स्वीकृति बन्द नभएको प्रष्ट पारेको छ ।

मान्यताप्राप्त देशमा जानको लागि श्रम कार्यालयले श्रम र पुनः श्रम स्वीकृति सहजै प्रदान गरिरहेको वैदेशिक रोजगार विभागका महानिर्देशक कुमारप्रसाद दाहालले बताउनुभयो ।

‘पहिले जहाँबाट जसरी श्रम स्वीकृति पाइन्थ्यो अहिले पनि त्यसैगरी पाइन्छ’ दाहालले भन्नुभयो ।

गएको मंगलबार बिहान श्रम, रोजगार तथा सामाजिक सुरक्षा मन्त्री रामेश्वर राय यादवले कोरोना भाइरसको संक्रमणको कारण श्रम स्वीकृति दिन बन्द गरिएको जानकारी गराउनुभएको थियो । त्यही दिन बेलुकी उहाँ आफैंले बन्द नभएको जानकारी गराउनुभयो ।

मन्त्रीको यही दोहोरो कुराले वैदेशिक रोजगारीमा रहेका धेरै नेपालीहरुमा अन्यौल भएको छ ।

यसै कारणले कतारमा रहेका नेपाली श्रमिकहरुले यसबारे बुझ्न दूतावासमा फोन गर्न थालेपछि बिहीबार दूतावासले पनि श्रम स्वीकृति बन्द नगरिएको प्रष्ट पारेको थियो ।

श्रम स्वीकृति नै बन्द नभए पनि अहिलेलाई वैदेशिक रोजगारीको लागि कोरोना प्रभावित देशमा नगएकै राम्रो हुने दाहालले बताउनुभयो ।

वैदेशिक रोजगार विभागले कोरोना प्रभावित देशहरुहरुबाट र यी देशको ट्रान्जिट भएर स्वेदश फर्किने नेपाली कामदारले १४ दिनसम्म आफ्नो घरबाट बाहिर नजान र कसैसँग घुलमिल नगर्न पनि सुझाव दिएको छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)