आज बिहानै स्वदेश आइपुगे ४ सय ६८ नेपाली, साउदीबाट आउने जहाजले १६ नेपालीको शव पनि ल्याउँदै

असार १३, २०७७ शनिबार ९:१७:४५ | उज्यालो सहकर्मी

काठमाण्डौ – आज बिहानै ४ सय ६८ जना नेपाली काठमाण्डौ आइपुगेका छन् । कतारको दोहाबाट २४१ जना, हङ्कङबाट १ बच्चासहित ८१ जना र यूएई १४६ जना विभिन्न चार्टर्ड उडानमार्फत बिहान काठमाण्डौ आइपुगेका त्रिभुवन अन्तर्राष्ट्रिय विमानस्थलले जनाएको छ ।

आजै साउदीको दमामबाट १५४ जना नेपाली फर्कंदै छन् भने साउदीको रियादबाट पनि नेपालीहरु फर्कने तालिका रहेको विमानस्थलले जनाएको छ । कुवेतबाट पनि त्यहाँ आममाफीमा सहभागी नेपालीहरु स्वदेश फर्कंदै छन् । कुवेत सरकार आफैंले त्यहाँ समस्यामा रहेका नेपालीलाई स्वदेश ल्याइदिइरहेको छ ।

यस्तै आज साउदीबाट आउने जहाजले १६ जना नेपालीको शव ल्याउने वैदेशिक रोजगार बोर्डले जनाएको छ । बोर्डका कार्यकारी निर्देशक राजनप्रसाद श्रेष्ठका अनुसार बोर्ड र दूतावासको समन्वयमा शव ल्याउने काम भइरहेको छ ।

यसरी ल्याइएका शव बोर्डले नै निःशुल्क घरसम्म पुर्‍याइदिने गरेको छ । लकडाउनका कारण आफन्त शव बुझ्न विमानस्थलसम्म आउन नपाएमा बोर्ड आफैंले शव बुझेर घरसम्म पुर्‍याइदिइरहेको बोर्डका कार्यकारी निर्देशक श्रेष्ठले बताउनुभयो ।

अहिले बोर्डमा मृतक श्रमिकका हकवालाई दिने राहत रकम पनि दिन थालिएको छ । लकडाउनका कारण गाउँगाउँबाट काठमाण्डौ आउन नसक्ने अवस्था भए पनि पालिकाबाटै बोर्डबाट पाउने राहत बापतको रकमका लागि निवेदन दिन सकिनेछ । अहिले बोर्डको कार्यालय खुलेसँगै केही मृतकका आफन्त बोर्डको कार्यालय आएर निवेदन दिन थालेका कार्यकारी निर्देशक श्रेष्ठले बताउनुभयोे ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)