विदेशबाट आएको शव मृतकको घरसम्म पुर्‍याउन साउन महिनामा मात्रै १८ लाख भन्दा धेरै खर्च

भदौ १८, २०७७ बिहीबार १३:३५:४९ | उज्यालो सहकर्मी

काठमाण्डौ – वैदेशिक रोजगारीको सिलसिलामा ज्यान गुमाएका नेपालीको शव घरसम्म पुर्‍याउन एक महिनामा १८ लाख रुपैयाँभन्दा धेरै खर्च भएको छ ।

साउन महिनामा मात्रै विदेशबाट त्रिभुवन अन्तर्राष्ट्रिय विमानस्थल आइपुगेको शव मृतकको घरसम्म पुर्‍याउन १८ लाख २१ हजार ४९२ हजार रुपैयाँ खर्च भएको वैदेशिक रोजगार बोर्डले जनाएको छ । यो रकमबाट ९८ जना मृतकको शव विमानस्थलबाट घरसम्म पुर्‍याइदिएको छ ।

बोर्डले वैदेशिक रोजगारीको क्रममा ज्यान गुमाएका नेपालीको शव निःशुल्क घरसम्म पुर्‍याइदिने गर्छ । महामारीको समयमा अहिले विमानस्थलमा आइपुगेका शव लिन आफन्त आउन नपाउँदा बोर्डले नै बुझेर पनि घरसम्म पुर्‍याउने गरेको छ ।

यस्तै साउन महिनामै बोर्डले ९४ जना मृततका हकवालालाई ६ करोड २४ लाख १० हजार रुपैयाँ आर्थिक सहायत प्रदान गरेको छ । श्रम स्वीकृति लिएर विदेश गएका र श्रम अवधि भित्रै ज्यान गुमाएका मृतकका आफन्त वा हकवालाई सात लाख रुपैयाँ आर्थिक सहायता दिने गरिएको छ । यो रकम श्रमिकले नै योगदान गरेको वैदेशिक रोजगार कल्याणकारी कोषबाट उपलब्ध गराइन्छ ।

साथै साउन महिनामा विदेशमा अंगभंग, बिरामी भएर फर्किएका १३ जनाले बोर्डबाट आर्थिक सहायता पाएका छन् । १ महिला र १२ पुरुष गरी १३ जनालाई ६७ लाख ५५ हजार रुपैयाँ आर्थिक सहायता प्रदान गरिएको बोर्डले जनाएको छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)