चितवनमा आप्रवासी स्रोत केन्द्र स्थापना, वैदेशिक रोजगारीका समस्या न्यूनीकरण हुने विश्वास

पुष ३, २०७७ शुक्रबार १२:३९:२९ | रासस

चितवन – जिल्ला प्रशासन कार्यालय चितवनमा सुरक्षित वैदेशिक रोजगारीका लागि आप्रवासी स्रोत केन्द्रको उद्घाटन गरिएको छ । अन्तर्राष्ट्रिय आप्रवासी कामदार दिवसको अवसरमा शुक्रबार स्रोत केन्द्रको उद्घाटन गरिएको हो ।

महानगरपालिकाका प्रमुख रेनु दाहालले वैदेशिक रोजगारमा गएर नेपाली अलपत्र पर्ने अवस्था रहेकाले यसलाई न्यूनीकरणका लागि स्रोत केन्द्र महत्वपूर्ण हुने बताउनुभयो । वैदेशिक रोजगारमा गएर बेवारिसे बन्न पुगेकालाई यसले सहयोग गर्ने उहाँको भनाइ थियो ।

विदेश जाने तयारीमा रहेकालाई सही सूचना दिन, वैदेशिक रोजगारीको क्रममा समस्यामा परेमा उनीहरुको समस्या समाधानका लागि पहल गर्न र फर्किएकालाई विभिन्न सीपतालिममा जोड्नका लागि केन्द्रले सहयोग गर्ने यहाँले बताउनुभयो ।

स्वीस सरकार र नेपाल सरकारबीच भएको दुई पक्षीय सम्झौता अन्तर्गत श्रम, रोजगार तथा सामाजिक सुरक्षा मन्त्रालयको नेतृत्व र हेल्भटास नेपालको प्राविधिक सहयोगमा सञ्चालिन सुरक्षित आप्रवासन परियोजना सामीमार्फत अहिले ३९ जिल्लामा पालिकामार्फत कार्यक्रम सञ्चालनमा छन् ।

यस्तै, महानगरले विदेशबाट स्वदेश फर्किएकाको लागि ‘विदेशको सीप स्वदेशको कार्यक्रम’ सञ्चालन गर्ने तयारीसमेत गरेको छ । यस कार्यक्रमअन्तर्गत पाँच लाखसम्म ऋण लिएर व्यवसाय गर्नेका लागि सम्पूर्ण व्याज महानगरले व्यहोर्ने र २५ लाखसम्म ऋण लिनका लागि दुई प्रतिशत व्याज महानगरले व्यहोर्ने प्रमुख दाहालले जानकारी दिनुभयो ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)