बुद्धपूर्णिमाको दिनदेखि भैरहवामा जजिरा एअरलाइन्सको उडान सुरु हुने, नेपालबाट ३० यात्रुको बुकिङ्

वैशाख १०, २०७९ शनिबार १८:५८:२१ | विमल बिष्ट

काठमाण्डौ – गएकाे बिहीबारदेखि विधिवत् रुपमा सञ्चालन भएको भैरहवास्थित गौतमबुद्ध अन्तर्राष्ट्रिय विमानस्थलमा जजिरा एअरलाइन्सले बुद्धपूर्णिमाकै दिनदेखि उडान सुरु गर्ने भएकाे छ । बुद्धपूर्णिमा अर्थात् जेठ दुई गते कुवेतबाट २७८ जना यात्रु बोक्नसक्ने क्षमताको न्यारोबडी जहाजले उडान भर्ने भएको छ । त्यसको भोलिपल्ट बिहान साढे दुई बजे नेपालबाट ३० जना यात्रु बोकी कुवेतका लागि उडान भर्ने योजना रहेको नेपाल नागरिक उड्डयन प्राधिकरणले जनाएको छ ।

त्यसपछि हप्ताको तीन दिन (सोमबार, बुधबार र शुक्रबार) नियमित उडान भर्नेगरी प्रक्रिया अगाडि बढाइसकेको र आफ्नो ट्राभलले यताबाट जाने ३० जना यात्रुको बुकिङ गरिसकेको उद्योग वाणिज्य संघ सिद्धार्थनगरको पर्यटन विभाग प्रमुख सञ्जय बजिमयले जानकारी दिनुभयो । पुरानो विमानस्थलमा अहिले दैनिक २४ वटा जहाजले उडान भर्छन् । एउटा मात्र रनवेले कारण ट्राफिक जाम हुनेगरेका कारण जाम व्यवस्थापन गर्न अन्तर्राष्ट्रिय विमानको उडानलाई रातिको समयमा राखिएको उक्त अन्तर्राष्ट्रिय विमानस्थलका महाप्रबन्धक गोविन्द दाहालले बताउनुभयो । उहाँका अनुसार जजिराको उडान हुने खबरले व्यवसायीहरु उत्साहित देखिएका छन् ।

भैरहवामा रहेकाे गौतम बुद्ध अन्तर्राष्ट्रिय विमानस्थलमा सानाठूला गरी दैनिक पाँच वटा अन्तर्राष्ट्रिय उडान एकैचोटी भर्नसक्ने तीन हजार पाँच सय मिटर लामो धावनमार्ग भएकाले उडान अवतरणमा सहज हुने अपेक्षा लिइएको नेपाल नागरिक उड्डयन प्राधिकरणका महानिर्देशक इञ्जिनियर प्रदीपकुमार अधिकारीले बताउनुभयो । उहाँले भन्नुभयो, “धावनमार्ग लामो र साना ठूला गरी दैनिक पाँच वटा अन्तर्राष्ट्रिय उडान भर्न सकिने भएकाले यहाँ सहज हुने छ ।”

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)