वैदेशिक रोजगारीको नाममा कन्सल्टेन्सीबाट एक महिनामै ५ करोड ठगी

जेठ २०, २०७९ शुक्रबार १३:२२:२४ | उज्यालो सहकर्मी

काठमाण्डौ – वैदेशिक रोजगारीको नाममा शैक्षिक परामर्शका लागि खुलेका विभिन्न कन्सलटेन्सीहरुले एक महिनामै ५ करोड रुपैयाँ ठगी गरेका छन् ।

वैदेशिक रोजगार विभागका अनुसार पछिल्लो समय शैक्षिक परामर्श सेवाका लागि शिक्षा मन्त्रालयबाट स्वीकृति लिएर खोलिएका संस्थाले नै वैदेशिक रोजगार व्यवसायमा जोडिएर गएको महिना मात्रै ५ करोडौँ रकम ठगी गरेको पाइएको हो ।

एक शैक्षिक परामर्श संस्था, ट्राभल एजेन्सी र व्यक्तिगतसहित गएको महिनामा मात्र ४ करोड ९३ लाखको दाबी र त्यसको हर्जानासहित ७ करोड रुपैयाँ बराबरको मुद्दा विभागले वैदेशिक रोजगार न्यायाधिकरणमा दायर गरिएको छ ।

कतिपय शैक्षिक परामर्श संस्थाले वैदेशिक रोजगारीमा पठाइदिने भन्दै लाखौँ रुपैयाँ असल गरी सञ्चालक फरार हुने गरेको उजुरी विभागमा परेको छ ।

विभागले हालसालै इन्टरनेसनल एक्पो एण्ड ट्राभल सर्भिस प्राली र जिनियस एजुकेसन एन्ड कन्सल्टेन्सी सर्भिस प्रालीले १४४ जनाबाट साढे ४ करोड उठाएपछि वैदेशिक रोजगार न्यायाधिकरणका मुद्दा दायर गरेको महानिर्देशक शेषनारायण पौडेलले बताउनुभयो ।

महानिर्देशक पौडेलका अनुसार शैक्षिक परामर्श सेवाका नाममा खुलेका धेरै संस्थाले वैदेशिक रोजगारीको काम गरिरहेकामध्ये अहिले ३ वटाको मुद्दा वैदेशिक रोजगार न्यायाधिकरणमा दायर गरिएको छ ।

श्रम, रोजगार तथा सामाजिक सुरक्षा मन्त्री कृष्णकुमार श्रेष्ठले वैदेशिक रोजगारीका नाममा हुने ठगी नियन्त्रण गर्न शून्य सहनशीलता नीति अपनाउने बताउनुभएको छ ।

सचिव एकनारायण अर्यालसहित बिहीबार बुद्धनगरस्थित वैदेशिक रोजगार विभागको आकस्मिक अनुगमन गर्दै मन्त्री श्रेष्ठले ठगीमा परेका युवालाई समयमा न्याय दिने तथा विदेशमा अलपत्र श्रमिकको तत्काल उद्धार गर्ने संयन्त्र बनाइने बताउनुभयो ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)