गाैतमबुद्ध र पोखरा अन्तर्राष्ट्रिय विमानस्थल पूर्ण क्षमतामा सञ्चालन गर्ने तयारी

असार ८, २०८१ शनिबार ९:१:४५ | उज्यालो सहकर्मी

काठमाण्डाै – सरकारले राष्ट्रिय गौरवको आयोजनाका रूपमा रहेका गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थललाई पूर्ण क्षमतामा सञ्चालन गर्ने तयारी थालेको छ । त्यही तयारीअनुसार प्रधानमन्त्री पुष्पकमल दाहाल प्रचण्डले हिजो सम्बन्धित निकायसँग छलफल गर्नुभएको छ । साथै उहाँले विमानस्थल पूर्ण क्षमतामा सञ्चालनका लागि प्रस्ताव तत्कालै ल्याउन पर्यटन मन्त्रालय र नागरिक उड्डयन प्राधिकरणलाई निर्देशनसमेत दिनुभएको छ ।

प्रधानमन्त्री तथा मन्त्रिपरिषद्को कार्यालय सिंहदरबारमा हिजो भएको छलफलमा प्रधानमन्त्री प्रचण्डले गौतमबुद्ध र पोखरा अन्तर्राष्ट्रिय विमानस्थल पूर्ण क्षमतामा सञ्चालन गर्ने विकल्प र उपायबारे सरोकारवाला निकायसँग छलफल गर्नुभएको हो । संस्कृति, पर्यटन तथा नागरिक उड्डयनमन्त्री हितबहादुर तामाङका अनुसार छलफलमा प्रधानमन्त्रीले दुवै विमानस्थल देशका लागि रणनीतिक महत्त्वका परियोजना भएको भन्दै पूर्ण क्षमतामा सञ्चालनका लागि सरकारी निकायले समन्वयकारी रूपमा समाधान खोज्नुपर्ने बताउनुभएको छ । सरकारको ठूलो लगानी भएको र निजी क्षेत्रले समेत पर्यटन पूर्वाधारमा लगानी गरिसकेको अवस्थामा ती विमानस्थल पूर्ण क्षमतामा सञ्चालन गर्नुको विकल्प नरहेको प्रधानमन्त्रीको भनाइ छ ।

काठमाण्डौको त्रिभुवन अन्तर्राष्ट्रिय विमानस्थलमा एअर ट्राफिकको समस्या रहेको र यसको उचित समाधान दिनुपर्ने आवश्यकता पनि देखिएको छलफलका क्रममा उठेको छ ।

वैदेशिक रोजगारीमा जाने र अन्य यात्रुलाई भैरहवा र पोखराबाटै उडान गराउने गरी तयारी गर्नुपर्नेमा प्रधानमन्त्रीको जोड छ । त्यसका लागि श्रम स्वीकृति, अध्यागमन, मेडिकललगायत सरकारी सेवा पोखरा र भैरहवामा व्यवस्थित गरिनुपर्नेमा प्रचण्डले जोड दिनुभयो । सरकारले विमानस्थल पूर्ण क्षमतामा सञ्चालनका लागि हवाई टिकट, ग्राउन्ड ह्यान्डलिङ, हवाई इन्धनमा सहुलियत दिन सक्ने पनि उहाँले बताउनुभएको छ ।

छलफलमा पर्यटनमन्त्री तामाङले आफूहरूले आवश्यक गृहकार्य गरेर विमानस्थल पूर्ण क्षमतामा सञ्चालन गर्नेसम्बन्धी प्रस्ताव प्रस्तुत गर्ने बताउनुभयो । दुवै विमानस्थल पूर्ण क्षमतामा सञ्चालनका लागि मन्त्रालयको तर्फबाट विदेशी विमान कम्पनीसँग छलफल भइरहेको छलफलका क्रममा जानकारी गराइएको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्