काठमाण्डाै – आईसीसी टी–२० विश्वकप क्रिकेटकाे फाइनलमा आज राति भारत र दक्षिण अफ्रिका खेल्दैछन् । याे खेल राति सवा ८ बजे बारबाडाेसकाे ब्रिजटाउनमा रहेकाे केन्सिङ्टन ओभलमा शुरु हुनेछ ।

माैसम पूर्वानुमानकाे जानकारी दिने एजेन्सीहरूले याे खेलमा वर्षाले प्रभावित पार्नसक्ने अनुमान गरेका छन् । यदि वर्षा भयाे भने खेल पूरा हुनका लागि थप १ सय ९० मिनेटकाे समय दिइनेछ । विजेता बन्नका लागि कुनै पनि टिमले कम्तीमा १० ओभर ब्याटिङ गर्नुपर्नेछ । यदि आज थप समयमा पनि १० ओभरकाे ब्याटिङ नभएमा भाेलि 'रिजर्भ डे' काे दिन खेल जहाँ छाेडिएकाे थियाे त्यहीँबाट शुरु हुनेछ ।

आइतवार पनि वर्षाले खेल प्रभावित गर्नसक्ने सम्भावना छ । भाेलि पनि खेल नभएमा दुवै टिमलाई संयुक्त विजेता घाेषणा गरिनेछ । यदि खेल बराबरी भएमा 'सुपरओभर' बाट निर्णय हुनेछ । सुपरओभर पनि बराबरी भएमा फेरि एक पटक सुपरओभर हुनेछ । खेलकाे निर्णय नभएसम्म सुपरओभर दिइनेछ । यदि वर्षाका कारण सुपरओभर पनि भएन भने दुवै टाेलीलाई संयुक्त विजेता घाेषणा गरिनेछ । 

भारत अस्ति भएको दोस्रो सेमिफाइनलमा साविक विजेता इङ्गल्यान्डलाई ६८ रनले हराउँदै उपाधि नजिकै पुगेको हो । भारतले यसअघि सन् २००७ मा उपाधि जितेको थियो । त्यसपछि सन् २०१४ मा फाइनलमा पुगेको भारत श्रीलङ्कासँग पराजित भएको थियो ।

यस्तै दक्षिण अफ्रिकाले पहिलो पटक फाइनल खेल्दैछ । दक्षिण अफ्रिकाले अस्ति नै भएकाे पहिलाे सेमिफाइनलमा अफगानिस्तानलाई नौ विकेटले हराएर फाइनलमा पुगेको हो । दक्षिण अफ्रिका सन् २००९ र २०१४ मा सेमिफाइनलसम्म पुगेको थियो ।

नवौँ संस्करणको यो विश्वकपमा दुवै टोली अपराजित रहँदै फाइनलमा पुगेका हुन् । दक्षिण अफ्रिका आठ र भारत सात खेलमा अपराजित छन् । भारतले क्यानडासँगको खेलमा वर्षा बाधक हुँदा अङ्क बाँडेको थियो ।