म्याग्दी – बेनी नगरपालिकामा ज्येष्ठ नागरिक, शारीरिक रूपमा अपाङ्गता र अशक्त तथा दीर्घ रोगीलाई लक्षित गरेर सञ्चालित 'घरघरमा स्वास्थ्यकर्मी' कार्यक्रम प्रभावकारी बन्दै गएको छ ।

नगर क्षेत्रभित्रका ज्येष्ठ नागरिकलाई लक्षित गरि शुरु गरिएको कार्यक्रमबाट अहिलेसम्म एक हजार सात सय जना लाभान्विन भएका नगरपालिकाले जनाएको छ । घरमै स्वास्थ्यकर्मी पुगेर उपचार गर्ने कार्यक्रमबाट लक्षित समूहसँगै अन्य सर्वसाधारण पनि लाभान्वित भएका छन् ।

कार्यक्रमले बेनी नगरपालिकाको विभिन्न वडाबाट स्वास्थ्य सेवा लिनकै लागि जिल्ला सदरमुकाम बेनीबजारसम्म झर्नुपर्ने बाध्यताको अन्त्य भएको बेनी नगरपालिकाका मेयर सुरत केसीले बताउनुभयो । १० वटा वडा रहेको बेनी नगरपालिकाको ८ वटा वडामा मात्र यो कार्यक्रम सञ्चालन भइरहेको छ ।

२०७८ सालको जनगणनाअनुसार घरधुरी सङ्ख्या आठ हजार छ सय ५२ कायम भएको बेनी नगरपालिकामा कुल जनसङ्ख्या भने ३२ हजार छ सय ९७ रहेको छ । प्रत्येक महिनाको एकपटक बेनीका स्वास्थ्य संस्थाबाट स्वास्थ्यकर्मी नागरिकका घरघरमा पुगेर सेवा दिने गरेका छन् ।