भक्तपुरमा प्रदेश राजधानीको सम्भाव्यता अध्ययन

जेठ ३०, २०७५ बुधबार ६:२७:११ | रासस

भक्तपुर – प्रदेश नं ३ को स्थायी राजधानी निर्धारण गर्न गठन भएको प्रदेश राजधानी सम्भाव्यता अध्ययन समितिले प्रदेशको राजधानी सम्भाव्यता अध्ययन गर्ने क्रममा म‌ंगलबार भक्तपुर जिल्लाको स्थलगत अध्ययन गरेको छ ।

प्रदेशको राजधानी सम्भाव्यता अध्ययन विशेष समितिको सचिवालयमा दर्ता भएका जिल्लाको अध्ययन गर्ने क्रममा समितिका सभापति दीपक निरौलासहितको सदस्य टोलीले भक्तपुरको स्थलगत अध्ययन गरेको हो ।

भक्तपुरलाई स्थायी राजधानी निर्धारण गरेमा प्रदेशसभाको बैठक बस्ने स्थानका रुपमा पहिचान गरेको बोडेस्थित कृषि विकास बैंकको तालीम हलमा भएको सुझाव संकलनमा सहभागी जनप्रतिनिधिले भक्तपुरमै स्थायी राजधानी बनाउनुपर्ने तर्क राखेका छन् ।

छलफलमा प्रतिनिधसभा सदस्य महेश बस्नेतले भक्तपुरको मात्रै नभई सिङ्गो ३ नं प्रदेशको हितका लागि भक्तपुर स्थायी राजधानी हुने चर्चा गर्दै केन्द्रीय राजधानीसँग जोडिएको भन्ने तर्कबाहेक भक्तपुर प्रदेश राजधानी हुन नहुने कुनै कारण नभएको बताउनुभयो ।

उहाँले भक्तपुरलाई प्रदेश राजधानी बनाउनेबारेमा प्रदेश सांसदबीच सर्वसम्मत निर्णय हुने विश्वास व्यक्त गर्दै केन्द्रीय राजधानीसँग जोडिएको भए पनि भक्तपुर सबै कारणले पछाडि परेको जिल्ला भएको बताउनुभयो ।

छलफलमा ३ नं प्रदेशका प्रदेशसभा सदस्य शशिजंग थापाले भक्तपुर नै प्रदेश राजधानी हुनुपर्ने १० वटा तर्क राख्दै सानोठिमी स्थित शिक्षा मन्त्रालय मातहतमा रहेका २०० रोपनी जग्गा, प्रशस्त क्वार्टरसहितको भौतिक संरचना रहेको, विशालसभा हल रहेको, सरकारले बनाएको प्राविधिक टोलीले भक्तपुर उपयुक्त भएको ठहर गरेको, अरनिको राजमार्गसँग जोडिएको क्षेत्र भएको, भौगोलिक सुगमता भएको, भौतिक संरचना निर्माणका लागि अरबौ रकम सरकारको बचत हुने, केन्द्रीय सरकारसँग तत्कालै पहुँच पुग्ने, स्थायी सरकारी कार्यालयका लागि प्रशस्त जग्गा जमिन भएको तर्क प्रस्तुत गर्दै भक्तपुरको विकल्प नभएको बताउनुभयो ।

नेपाल मजदुर किसान पार्टीबाट प्रतिनिधित्व गर्ने ३ नं प्रदेशका प्रदेशसभा सदस्य सिर्जना सैजुले भने संसद्भित्रको कुरालाई बाहिर ल्याएर बहस गर्न नहुने तर्क गर्दै भक्तपुर मात्रै नभई काठमाडौँको वरपर नै राख्न नहुने बताउनुभयो ।

छलफलमा जिल्ला समन्वय समितिका प्रमुख नवराज गेलाल, मध्यपुरथिमि नगरपालिका प्रमुख मदनसुन्दर श्रेष्ठ, सूर्यविनायक नगरपालिकाका उपप्रमुख जुना बस्नेत, मध्यपुरथिमि नगरपालिकाका प्रशासकीय अधिकृत कमल ज्ञवाली, नेपाल पत्रकार महासंघ भक्तपुरका अध्यक्ष पुष्करराज बुढाथोकी, नेकपाका भक्तपुर जिल्ला अध्यक्ष बचन देउजा, नेकपाका नेता देबेन्द्र श्रेष्ठ, नेपाली काँग्रेसका जिल्ला नेता निशान ढुङ्गेलले सबै दृष्टिकोणबाट भक्तपुर प्रदेश राजधानी उपयुक्त भएको सुझाव राख्नु भएको थियो ।

भक्तपुर, काभ्रे र नुवाकोटको अध्ययन पूरा गरेको समितिले अब चितवन र मकवानपुरको अध्ययनपश्चात आगामी असार १० गते प्रतिवेदन पेश गर्ने भएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्