आगजनी भए पनि माग धान्ने गरी ‘सञ्चो’ मौज्दात छ

चैत २३, २०८१ शनिबार १८:३८:५८ | सङ्गीता यादव

जडीबुटी उत्पादन तथा प्रशोधन कम्पनी लिमिटेडको कार्यालयमा भएको आक्रमणबाट सबैभन्दा बढी क्षति भवनहरुमा भएको छ । ‘सञ्चो’ भनेर धेरै नेपालीलाई थाहा छ तर उत्पादक संस्थाबारे कतिपयलाई थाहा नहुन सक्छ । कम्पनीले अन्य विविध उत्पादनहरू गरिरहे पनि ‘सञ्चो’ एक स्थापित ‘ब्रान्ड’ नै भइसकेको थियो । जसले उत्पादक कम्पनीबारे पनि आमनागरिकमा एउटा छाप छोड्दै थियो । यसका पछाडि वर्षौदेखि संस्था र सरकारका लगानी तथा मेहनत छ । विडम्बना, त्यही संस्था गएको फागुन १५ गते शुक्रवारदेखि भग्नावशेषमा परिणत भएको छ । एक्कासी भएको आक्रमण र आगजनीबाट जडीबुटी उत्पादन तथा प्रशोधन कम्पनी लिमिटेड खण्डहर बनेको हो ।

कम्पनीमा रहेका उपकरण र अन्य सामग्री जलेर खरानी भएका छन् । औषधि उत्पादनमा प्रयोग हुने कच्चापदार्थ, उपकरण, फर्निचर, कागजातल, प्याकेजिङलगायत सामग्री जलेर नष्ट भएका छन् । प्रारम्भिक विश्लेषणअनुसार आगजनीबाट अनुमानित २८ करोड रुपैयाँ बराबरको क्षति हुन पुगेको छ । त्यो दिन सम्झिँदा मन भक्कानिन्छ । जनमानसमा ‘सञ्चो’उत्पादन गर्ने संस्थाका रूपमा चिनिएको यस कम्पनीलाई आफ्नै आँखा अगाडि खरानी भएको देख्दा मन रोएको छ । म महाप्रबन्धक भएर आएपछि आफैँले त्यो नयाँ मेसिन राखेको थिएँ । अब यो लेभलसम्म आयो भनेर कति खुशी थियाैं तर आँखा अगाडि नै त्यो सबै संरचना जलेको देख्दा आँखाबाट आँसु नै आयो । मन थाम्न सकिनँ । यस्तो हुन पुग्यो ।

अहिले उत्पादन ठप्प भएको छ । यद्यपि चाँडै नै कम्पनी पुरानै अवस्थामा फर्किने आशा छ । सबै जलेर खरानीमा परिणत भएको छ । कम्पनी विविध चुनौतीका बीच एक चरणमा अगाडि बढिरहेको थियो, शाखा पनि विस्तार गरिसकेका थियौँ । हामी सबै कर्मचारी उत्साहित थियौँ तर हुलदङ्गाको चपेटामा परेर सबै गुम्यो । अब सरकारले यसलाई गम्भीर भएर सोचिदिनुपर्छ । पहिलाकै अवस्थामा कम्पनीलाई ल्याउन कठिन भए पनि प्रयास र समन्वय भइरहेको छ ।

कम्पनीले देशभर रहेका शाखा कार्यालयबाट उत्पादन शुरु गर्ने लक्ष्य राखेको छ । सातवटै प्रदेशमा शाखा राख्ने भनेर विभिन्न ठाउँमा काम भइसकेको छ । लुम्बिनी प्रदेशमा मात्र जान बाँकी थियो । जाजरकोटमा पनि हालैमात्र शाखा विस्तार गरेका थियौँ । गोरखामा पनि शुरु गर्ने तयारी थियो । अब जिल्लामा रहेका शाखाबाट उत्पादन गर्ने कोशिस गर्छौं तर जति माग थियो त्यसलाई भने धान्न सकिँदैन । अस्थायी संरचना तयार गरेर भए पनि उत्पादन शुरु गर्ने र यसका लागि सम्बन्धित निकायको ध्यानाकर्षण हुनुपर्छ । छानविन आफ्नो ठाउँमा छ । आफ्नो तर्फबाट सम्बन्धित निकायसँग पहल गरिरहेका छौँ । व्यवसाय गर्ने संस्था हो । आफैँ कमाउने आफैं खाने संस्था हो । अर्थतन्त्रमा यसको पनि योगदान हुन्छ । त्यसैले उत्पादन रोकिनुहुन्न । सञ्चोको उत्पादन पुनः हुनुपर्छ भनेर लागिरहेका छौँ, यसमा सबैबाट सहयोग पाउने आशा गरेका छौँ । २०३८ सालमा स्थापित सरकारको स्वामित्व भएको यो कम्पनीले विभिन्न औषधिमुलक एवम् सुगन्धित जडीबुटीहरूको सङ्कलन र प्रशोधन गर्दै आएको छ । कम्पनीले सञ्चो, भिक्स, हिमालय मसाज तेल, सञ्चो जटा केश तेललगायत उत्पादन गर्दै आएको छ ।

सबैभन्दा बढी बिक्री हुने उत्पादनमा ‘सञ्चो’ पर्छ । यो उत्पादन सबै नेपालीले गौरव गर्ने वस्तु हो । केही दिनमा मेसिनको परीक्षणपछि फेरि उत्पादन हुन्छ । अहिले कम्पनीमा उत्पादन नभए पनि हामीसँग माग धान्ने गरी मौज्दात छ । माग धान्न गाह्रो हुँदैन । वर्षमा ६० लाख वटाको दरमा लक्ष्य लिएर कम्पनीले उत्पादन गरिरहेको छ । पछिल्लो समय नयाँ मेसिन जोडिएको छ । यो मेसिनले वर्षमा एक करोड ‘सञ्चो’ उत्पादन गर्ने क्षमता छ । आगजनीबाट अब मेसिनले उत्पादन क्षमता केही कम हुन सक्छ । तर यो मेसिनले उत्पादन भने गरिरहन्छ । त्यसैले हामी छोटो समय र लामो समयसम्म कसरी उत्पादन गर्न सकिन्छ भनेर योजना बनाएर लागिरहेका छौं । उद्योग नै बन्द हुने अवस्था छैन । यहाँबाट भएन भने पनि शाखा कार्यालयहरुबाट उत्पादन गर्न मिल्छ । ‘सञ्चो’लाई कहाँबाट र कसरी उत्पादन गर्न सकिन्छ भनेर हामीले योजना बनाइरहेका छौं ।

(जडीबुटी उत्पादन तथा प्रशोधन कम्पनी लिमिटेडकी महाप्रबन्धक सङ्गीता यादवसँगको कुराकानीमा आधारित)

अन्तिम अपडेट: चैत २४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सङ्गीता यादव

यादव जडीबुटी उत्पादन तथा प्रशोधन कम्पनी लिमिटेडकी महाप्रबन्धक हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्