कालिकोट - कालिकोटको पलाँता गाउँपालिका-१ को खाडाबस्तीमा आगोले नष्ट भएका घरको पुनर्निर्माण प्रदेश सरकारले गर्ने भएको छ ।

सोमबार अग्नि प्रभावितलाई खाद्यान्न र लत्ताकपडा लिएर खाडाबस्ती पुगेका प्रदेश ६ का मुख्यमन्त्री महेन्द्रबहादुर शाहीले आगोले जलेर नष्ट भएका ८७ वटै घर प्रदेश सरकारले बनाइदिने घोषणा गर्नुभएको हो ।

खाडाबस्तीका अन्य खरको छानो भएका घरलाई पनि विस्थापित गरी बस्ती विकास कार्यक्रम अन्तर्गत पुनर्निर्माण गरिने मुख्यमन्त्री शाहीले बताउनुभयो । यसअघि पनि खाडाबस्तीमा आगलागी भएकोले बस्ती नै अन्यत्र सार्ने वा त्यही ठाउँमा बस्ती विकास गर्ने भन्ने विषयमा प्रदेश सरकारले बैठक बसेर निर्णय लिने उहाँले बताउनुभयो ।

पलाँताका नविन न्यौपानेको घरबाट सल्किएको आगोका कारण ८७ घर जलेर नष्ट भएका थिए भने आगो निभाउने क्रममा ७ जना घाइते भएका थिए ।