रामेछापमा वैशाखे झरीको बितण्डा

वैशाख ३१, २०७५ सोमबार १२:०:१४ | दीपक भट्ट

रामेछाप, वैशाख ३१ – सोमबार बिहान संचालन हुने कक्षा ११ को परीक्षा दिन मन्थलीबाट मुगिटारतर्फ जाँदै गरेका विद्यार्थीलाई स्थानीय रणजोर खोलाले बगाउँदा एकजना वेपत्ता भएका छन् । बेपत्ता हुनेमा मन्थली नगरपालीका वडा नं–१ की १८ वर्षीया उष्मा फुयाँल रहेकी छन् ।

पानी पर्दै गरेको समयमा घरवाट मन्थली नगरपालिका–७ मा अवस्थित रुद्राक्षेश्वर मावि मुगिटार परीक्षा केन्द्रमा परीक्षा दिन हिँडेका परिक्षार्थीहरुमध्ये ६ जनालाई तामाकोशी नदी किनार नजिकै रणजोर खोलाबाट हात समाएर खोला तर्ने क्रममा खोलाले बगाएको थियो ।

बगाएकामध्ये तामाकोशी किनारमा पुगेपछि ५ जना कोशी किनारबाट निस्कन सफल भएका थिए । उनीहरुमध्ये दुईजना सामान्य घाइते भएका छन् भने अन्य तीन जनाको अवस्था सामान्य रहेको छ । घाइते दुईजनाको रामेछाप सामुदायिक अस्पतालमा उपचार भइरहेको जिल्ला प्रहरी कार्यालय रामेछापले जनाएको छ ।

वर्षाले रणजोर खोला र मन्थली आसपासका खहरेहरुमा बाढी आएको थियो । अव्यवस्थित तरीकाले खनिएका सडकबाट माटो र गेगर बगाएर मन्थली बसपार्क, भैश्वेवर चोक, ट्राफिक चोक र आकाशे एरियाका घरहरुमा पानीले बगाएर ल्याएको गेगर र हिलो पसेर अस्तव्यस्त भएको छ ।

बाढीले सबैभन्दा बढी असर मन्थली बसपार्क क्षेत्रमा पुगेको छ । बसपार्क र यत्रतत्र पार्किङ्ग गरि राखेका बस, मालवाहक गाडी र मोटरसाइकलमा समेत क्षति पुगेको छ ।

यसैगरी देवकोटा चोकबाट बसपार्कको बीचमा पर्ने जिल्ला आयुर्देद स्वास्थ्य केन्द्र र मन्थली गेटबीचका खहरे खोला र खोल्साका नजिकैको सडक समेतमा क्षति पुगेको छ । गेगरले पुरेकामध्ये सबैभन्दा चल्तीको भैश्वेश्वर चोकमा जम्मा भएको गेगरलाई स्काइभेटर लगाएर हटाइएको छ ।

बाढी प्रभावित बसपार्क क्षेत्रमा पुरिएका गेगर र हिलो समेत पन्छाउने काम भइरहेको जिल्ला प्रहरी कार्यालय रामेछापका प्रहरी निरीक्षक राजेन्द्रकुमार थापाले जानकारी दिनुभयो ।

सडक अवरुद्ध

वर्षाका कारण मन्थलीदेखि काठमाण्डौंतर्फ जाने र मन्थलीबाट दोलखा तथा मन्थलीबाट ग्रामिण क्षेत्रतर्फ जाने धेरै सडक समेत अवरुद्ध भएका छन् । बाढीले पुष्पलाल राजमार्ग अन्तर्गत मन्थलीबाट करिव १३ किलोमिटर टाढाको सेलेघाट बजार क्षेत्रको सडक समेत अवरुद्ध हुँदा काठमाडौं ओहोरदोहोर गर्ने गाडी चल्न सकेका छैनन् । सडक खुलाउने काम भैरहेको मन्थली नगरपालिकाका प्रमुख रमेशकुमार बस्नेतले जानकारी दिनुभयो ।

भूकम्प पीडित मारमा

बाढीका कारण भूकम्प पीडिढत पूर्णरुपमा प्रभावित भएका छन् । निर्माणाधीन घरका लागि तयारी अवस्थामा राखिएको गिट्टी, ढुङा, वालुवा र ईट्टा समेत पुरिएको र बगाएको छ । पीडित बस्दै आएका अस्थायी टहरामा समेत पानी पसेको छ ।

अहिले वर्षा रोकिएको भए पनि मौसम बदली भएका कारण जुनसुकै बेला पनि पानी पर्ने सम्भावना बढेपछि प्रभावितहरु चिन्तित छन् ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

दीपक भट्ट

दीपक भट्ट उज्यालोका रामेछाप सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्