हत्याका फरार अभियुक्त १३ वर्षपछि पक्राउ

दोस्राे नागरिकता लिएर पनि जोगिएनन् !

फागुन २३, २०७५ बिहीबार ७:२७:१४ | अमर सुनार

दैलेख – हत्या गरी फरार रहेका अभियुक्तलाई प्रहरीले १३ वर्षपछि पक्राउ गर्न सफल भएको छ । दैलेखको भगवतीमाई गाउँपालिका–६ शनिगाउँका ३८ वर्षीय टोपबहादुर सिंहलाई जिल्ला प्रहरी कार्यालय दैलेखले बुधवार घरबाटै पक्राउ गरेको हो ।

२०६२ कात्तिक १६ गते साविकको कट्टी गाविस–६ सनिगाउँ (अहिलेको भगवतीमाई गाउँपालिका–६) का २१ वर्षीय शेरबहादुर पुनमगरको हत्या गरेको अभियोगमा २०६७ चैत २३ गते दैलेख जिल्ला अदालतले ५ वर्ष जेल सजाय तोकेको थियो ।

फैसला भइसकेको कैद असुली गर्न पर्ने अभियुक्तलाई अदालतमा पेश गर्नुपर्ने नियम अनुसार प्रहरीले बुधबार नै दैलेख जिल्ला अदालतमा बुझाएको थियो । त्यसपछि उनलाई दैलेख कारागारमा राखेको दैलेखका प्रहरी इञ्चार्ज डीएसपी ठाकुरप्रसाद पोखरेलले जानकारी दिनुभयो ।

देउसी भैलो खेल्ने दुई टोलीबीच भएको विवादमा लाठीले प्रहार गर्दा शेरबहादुरको घटनास्थलमा नै ज्यान गएको थियो । घटनामा संलग्न टोपबहादुरसहित ४ जनालाई तत्कालीन जिल्ला न्यायाधीश ठाकुरप्रसाद शर्माको इजलासले सजाय सुनाएको थियो । टोपबहादुर सिंहसहित प्रेमबहादुर सिंह, कर्णबहादुर सिंह र प्रदीप सिंहलाई ५ वर्ष कैद सजाय तोकिएको थियो ।

हत्या गर्ने योजना नभई गाउँमा भैली खेलिरहेको बेला शेरबहादुर पुनमगर र टोपबहादुर सिंहको टोलीबीच विवाद हुँदा समूहगत झडपका क्रममामा शेरबहादुरको ज्यान गएको प्रहरी अनुसन्धानबाट पत्ता लागेको थियो ।

घटना विवरण अनुसार लाठी प्रहारबाट घटनास्थलमै ज्यान गएपछि शेरबहादुरको शव पुरिएको थियो । माओवादी सशस्त्र युद्धको चरम उत्कर्षको बेला भएकोेले ९ दिनपछि कात्तिक २५ गते प्रहरीले घटनास्थल मुचुल्का गरेको थियो । घटना लगतै उनी भागेर भारत गएका र शान्ति प्रक्रियापछि लुकीछिपी घरमा आउने जाने गरेका थिए ।

पक्राउ परेका टोपबहादुर सिंहले ३ वर्ष अघि गाउँमा नागरिकता टोली जाँदा २०४५ कात्तिक १८ गते जन्म मिति जनाएर महेन्द्रबहादुर सिंहको नामबाट नयाँ नागरिकता लिएको खुलेको छ । नयाँ नागरिकता लिए यता परिचय बदलिएको ठानेर अलि बढी सार्वजनिक सहभागिता बढाएका थिए ।

टोपबहादुर सिंहले पछिल्लो पटक नाम बदलेर लिएको नागरिकतामा पनि आफ्नो पिताको नाम देवबहादुर सिंह नै जनाएका छन् । महेन्द्रबहादुर सिंहसमेत दुई छुट्टाछुट्टै नागरिकता लिएका टोपबहादुर सिंह, देवबहादुर सिंहका एक्लो छोरा हुन् ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अमर सुनार

दैलेखका उज्यालो सहकर्मी अमर सुनार मानवअधिकारको क्षेत्रमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्