नेपालीका लागि वैधानिक रुपमा नखुल्दै एजेण्टले मलेसिया पुर्‍याएछ

चैत २२, २०७५ शुक्रबार १२:४३:४२ | मेरो कथा मेरो भोगाई

खेमनारायण श्रेष्ठ/धादिङ ।

१० महिनादेखि बन्द रहेको मलेसियाको रोजगारी केही दिन अघिदेखि खुलेको छ । सन् २००१ देखि नेपालीहरुका लागि मलेसियाको रोजगारी वैधानिक रुपमा खुलेको हो ।

वैधानिक रुपमा खुलेपछि पुगेका नेपालीले पाएको दुःख सुन्दै र देख्दै आएका छौं तर म त नेपालीहरुका लागि मलेसियाको रोजगारी औपचारिक रुपमा नखुल्दै मलेसिया पुगेको रहेछु । मलेसिया पुगेपछि मात्रै नेपालीका लागि औपचारिक रुपमा खुलेकै रहेनछ भनेर थाहा पाएँ ।

म मलेसिया गएको सन् १९९९ मा हो । त्योभन्दा अघि म गाउँमा पढाउँथें । शिक्षकको जागिरले घर चल्दै थियो । तर द्वन्द्व सुरु भएपछि गाउँमा बसेर पढाउन सक्ने वातावरण रहेन । दिनदिनै कतै न कतै कोही न कोही अपहरणमा परेको खबर सुनिन थाल्यो ।

त्यो माहोलले मलाई पनि पिरोल्यो । म गाउँ छोडेर काठमाण्डौ आएँ । काठमाण्डौमा बस्ने क्रममा झापाका एक व्यक्ति साथी भए । म कमाउने बाटो खोज्दै थिएँ । उनले मलाई मलेसिया जाने भए कमाइ राम्रो हुन्छ भने ।

त्यतिखेर नेपालीलाई वैधानिक रुपमा मलेसियाको रोजगारी खुलेको रहेनछ । त्यो मलाई थाहा थिएन । मसँगै अरु पनि केही व्यक्तिलाई उनैले मलेसिया पठाए । नेपालबाट जान नपाइने भएपछि हामीलाई उनले भारतको कलकत्ता पुर्‍याए ।

अनि त्यहाँबाट ३ महिनाको भिजिट भिसा लगाएर थाइल्याण्ड पठाए । हामीलाई मलेसिया र थाइल्याण्डको सीमानामा लगेर राख्यो । त्यहीँ एक महिना बस्नुपर्‍यो । समस्या त्यहीँबाटै सुरु भइसकेको थियो । त्यहाँ बसुञ्जेल दुई छाक खान पाइएन । एक छाक खाएर दिन कटाउनुपथ्र्यो ।

एक महिनामा त्यहाँबाट मलेसिया पुर्‍याए । यहाँबाट लाने बेलामा काम चाहिँ जे भन्यो त्यही गर्नुपर्छ तर कमाइ चाहिँ हुन्छ भनेको थियो । त्यहाँ मैले ‘प्लान्टेसन’ को काम गर्नुपर्‍यो । हामीले बिरुवा उमार्ने, रोप्ने अनि बेच्ने काम गर्नुपथ्र्यो ।

अरु साथीहरुले डेढ लाखसम्म तिरेका थिए । मैले चाहिँ ८० हजार रुपैयाँ तिरेर गएको थिएँ । त्यतिबेला मलेसियन रिंगिटको भाउ कहिले १५ रुपैयाँ हुन्थ्यो त कहिले १७ रुपैयाँ । त्यही काम मैले एक वर्ष गरें ।

कमाउन नसकिरहेका बेला काम परिवर्तन गरिदियो । इटा उद्योगमा काम गरें । त्यहाँ हजार १२ सय रिंगिटसम्म कमाएँ । उद्योग बैधानिक नै थियो तर नेपालीका लागि वैधानिक रुपमा रोजगारी नखुलेकाले हामी चाहिँ अवैधानिक थियौं ।

त्यहाँ ६ महिना काम गरेपछि काम बाख्रा फर्ममा सार्‍यो । त्यहाँ ६ महिना काम गरेपछि सन् २००१ मा नेपालीका लागि वैधानिक रुपमा मलेसिया जाने बाटो खुल्यो । अनि अवैधानिक रुपमा पुगेका र काम गरिरहेकाहरुलाई फर्किन अवसर दिइयो ।

त्यही बेला म पनि मलेसियाबाट फर्किएँ । अवैधानिक रुपमा बस्दा कति समस्या पर्छ भन्ने मैले त्यतिबेलै भोगें । बाहिर निस्किन र हिँडडुल गर्न पाइँदैनथ्यो । घर फर्किएर दुई वर्ष बसें । सन् २००३ तिर दुबई गएँ । सेक्युरिटी गार्डमा ६५ हजार रुपैयाँ तिरेर गएको थिएँ ।

महिनाको ८ सय दिर्हाम तलब थियो । काम चाहिँ १२ घण्टा भनेको ठाउँमा १६ घण्टासम्म खट्नुपर्थ्याे । त्यसमा बस्न कम्पनीले दिए पनि खाना खर्च आफ्नै थियो । दुबई तीन वर्ष बसेर फर्किएँ । अहिले खेतीपातीसँगै गाउँका व्यक्तिहरु मिलेर सहकारी चलाउँदै छौं ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्