चलचित्र बनाउन गाउँपालिकाले १० लाख बजेट छुट्याएपछि स्थानीय भन्छन् : हामीलाई फिल्म होइन, विकास चाहिन्छ

असार ७, २०७६ शनिबार १३:१५:४७ | विमल बिष्ट

डोटी – अभिनेता विराज भट्टले निर्माण गर्न लागेको चलचित्र ‘साङ्लो’ लाई जोरायल गाउँपालिकाले १० लाख रुपैयाँ विनियोजन गरेपछि स्थानीयहरु आक्रोशित बनेका छन् ।

गाउँपालिकाको विकासका लागि आएको बजेटले गाउँको विकास गर्नुको सट्टा चलचित्रका लागि बजेट विनियोजन गरेको भन्दै स्थानीयहरु गाउँपालिका अध्यक्ष दुर्गादत्त ओझासँग आक्रोशित बनेका छन् ।

स्थानीय श्यामबहादुर मल्लले भन्नुभयो, ‘गाउँ-गाउँमा सडक, विद्युतलगायतका पूर्वाधारको विकास गर्नको साटो फिलिम बनाउनमा पैसा किन हाल्ने, जनतालाई फिल्म होइन, विकास चाहिन्छ ।’

गाउँपालिका अध्यक्ष दुर्गादत्त ओझाले गएको जेठ २७ गते सम्पन्न पाँचौं गाउँ सभाबाट ‘साङ्लो’ चलचित्रका लागि १० लाख रुपैयाँ विनियोजन गरेको दाबी गर्नुभयो । उहाँ भन्नुहुन्छ, ‘फिल्मका लागि मैले एक्लै बजेट विनियोजन गरेको होइन, गाउँ सभाबाट बजेट विनियोजन गरिएको हो, मलाई मात्रै दोष किन ?’

तत्कालीन नेकपा एमालेबाट निर्वाचित अर्थात् हालको नेकपा सम्बद्ध जनप्रतिनिधिहरुको स्पष्ट बहुमत रहेको गाउँ कार्यपालिकामा रहेका नेपाली कांग्रेसका जनप्रतिनिधिहरुले समेत रकम विनियोजन गर्ने निर्णय गरेको गाउँपालिका उपाध्यक्ष जमुना बोहराले बताउनुभयो । उहाँले भन्नुभयो, ‘सबै दलबाट निर्वाचित जनप्रतिनिधिले रकम विनियोजन गर्नका लागि हस्ताक्षर गरेका छन् , अहिले दोष हामीलाई मात्रै लगाए’, उहाँले भन्नुभयो ।

चलचित्रका लागि बजेट विनियोजन गरेको भन्दै आलोचना गर्नेहरुमा नेकपाका कार्यकर्ता र नेपाली कांग्रेससम्बद्ध सबै रहेका छन् । तर आलोचनाका विषयमा जोरायल गाउँपालिकाले हालसम्म कुनै आधिकारिक धारणा भने सार्वजनिक गरेको छैन ।

गाउँपालिका अध्यक्ष ओझाले भन्नुभयो, ‘विराज भट्टले निर्माण गर्न लाग्नुभएको ‘साङ्लो’ फिल्मले जोरायलका विभिन्न पर्यटकीय क्षेत्रलाई समेटेको छ, अहिले पनि छायाङ्कन जारी छ, फिल्ममा जोरायल क्षेत्र समेटिएर विश्व सामु चिनिनु गर्वको विषय हो । हामीले फिल्मका लागि नभई कलाकारहरुको यातायात र खाना खर्चमा १० लाख रुपैयाँ विनियोजन गरेका हौँ ।’

गाउँपालिकाका अध्यक्ष दुर्गादत्त ओझादेखि स्थानीय बासिन्दाहरुले पनि चलचित्रमा भूमिका निर्वाह गरेका छन् । कतिपयले जोरायलमा ‘साङ्लो’ चलचित्र छायाङ्कन हुनुलाई अवसरका रुपमा लिएका छन् भने कतिपयले बजेटको दुरुपयोग भनेको बताउँदै आएका छन् ।

स्थानीयहरुले आक्रोशित हुँदै सामाजिक सञ्जालमा टिकाटिप्पणी गर्न थालेपछि चलचित्र जोरायलमा छायाँकन गर्ने वा नगर्ने भन्ने विषयमा निर्माताहरु दोधारमा परेका छन् । ‘साङ्लो’ चलचिका नायक विराज भट्टले भने यस बारेमा केही प्रतिक्रिया नदिने बताउनु भयो ।

उहाँले भन्नुभयो, ‘जोरायलसहित समग्र सुदूर पश्चिमको कला, संस्कृतिलाई देशैभरि चिनाउनका लागि मैले निर्माण गर्न लागेको चलचित्रमा गाउँपालिकाको रकम विवाद बारे म केही बोल्दिन ।’ नायक विराज भट्ट सुदूर पश्चिमको डडेल्धुरा जिल्लाका स्थायी बासिन्दा हुनुहुन्छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्